Авраам база Лот

Удаваанда Авраам-биле Лот бода малдыг, хой- өшкүзү өзүп көвүдээн, алдын, мөңгүнү база хөй, аажок бай апарган. Удаваанда оларга таарымча чок байдал тургустунуп келген; мал-маган көвүдеп, кадат-чер чедишпестей берген болгаш кадарчылары аразында бо-ла маргыжып, кыржыр.

Ынчангаш Авраам Лотка чугаалаан:

— Бис төрелдер бис, а ийи аравыста азы бистиң кадарчыларывыс аразында маргыжып туруп бээривиске эки болбас. Аравыс ырадыр көжүп аалы. Сен солагай талаже көжер болзуңза, мен оң талаже азы солуштур көжер бис.

Авраам Лотка кайнаар көжерин шилип алыр арганы берген. А Лот көөрге Иордан хемниң шынаалары аажок дүжүткүр хөрзүннүг болган. Ол Дээрги-­Чаяакчының сесерлии дег каас, чараш сагындырган. Лот чүгле бодун бодап, кайгамчык черни шилип алган. Ол кайгамчык черде чүү манап турарын-даа, чурттакчылары каржы бак бачыттыг турганы дээш, Содом, Гоморра хоорайларын Дээрги-­Чаяакчы узуткап каарын-даа билбээн, чүге дизе Лот ол дугайында боданмаан. Лот Бурганны хүндүлээр турган-даа болза, Содомнуң мөзү чок улузунуң аразынга чурттаарында багай чүве көрбээн.

Үе эрткенде Бурган Бодунуң шиитпирин Авраамга чугаалаан:

— Содом база Гоморраның чурттакчыларының бужар үүлгедиглери, хөлүн эрти. Ол хоорайларда кижилер Мээң бодап алганым кеземчеге төлептиг бе, барып хынап көрейн.

Бурган Содомче ийи Ангел чоруткан. Авраам Бургандан дилеп эгелээн:

— Ол хоорайда 50 кем-буруу чок кижилер бар чадавас. Оларны дээш, хоорайны кеземчеден чайладып болбас Сен бе?

Кем чок 50 актыг кижи тыптыр болза, Дээрги-­Чаяакчы кээргеп өршээрин аазаан. Авраам ол-ла айтырыын каттаптап-ла турган, чүгле айтырыг санында санны кызырып 45,30, 20, 10‑га чедир. Ол кижилер дээш Бурган өршээрин аазаан.

Бир хүн кежээликтей Лот хоорай хаалгазында хоорай баштыңнары чыглыр черге олурда ийи Ангел келген. Лот оларны көрүп кааш, мөгейгеш, ооң бажыңынга хонуп аарын чалаарга, олары:

— Чок, бис даштыгаа хонуп аар бис — дээннер.

Содом чурттакчылары өскээртен келген улусту канчап-даа каап болур деп, Лот билир. Ынчангаш чорумалдарның ооң-биле кады баарын ээрежип албадаан. Олар кежээки чем чип безин четтикпээнде даштын улус улуг шимээн үндүрген. Келген улус аачыларны бажыңдан оларга үндүрзүн деп Лоттан негээннер. Лот келген улузун камгалаарга, олар Лотка кыжанып эгелээннер. Ол үеде Бурганның төлээлери бажың даштында улуг, бичии кижилерниң карактарын согурартыпкаш, Лотка мынча дээннер:

— Чоок кижилериңни дүрген хоорай даштынче үндүре бер, чүге дээрге бачыт багы дээш, Бурганга четкен ыы-сыы дээш хоорайны узуткаар бис.

Лоттуң уругларының душтуктары бүзүревейн, ону баштак чугаа деп бодааннар. Ол хомуданчыг. Лот боду безин далашпас боорга, Ангелдер ооң бодун, кадайын, уругларын холдарындан алгаш, хоорай даштынче үндүре берген. Бурган оларның амы-тынын хайыралаар дээн болгаш, дедир хоорайже хая көрүнмес деп дужаал берген. Ындыг-даа болза Лоттуң кадайы Бурганның сөзүн дыңнавайн, хая көрнүпкеш, ол-ла дораан дус көжээ болу берген. А Лот уруглары-биле хоорайдан ырадыр маңнажыпкан…

Дээрги-­Чаяакчы дээрден оттуг күгүрнү Содом база Гоморраже чаашкын суу дег бадырыпкан. Ол хоорайлар, оларның чоогу суурлар база Иордан шынаазынга дириг чүве артпаан, узуткаттынган. Бурунгуда ол Иордан хемниң кончуг чараш шынаазын турган черде амгы үеде амыдырал чок хөл бар, Библияда ооң ады “Дус (Өлүг) далай” азы Дустуг, Өлүг хөл деп адаттынган.