Иисустуң Иерусалимче киргени

Пасха байырлалы чоокшулап келген. Иисус өөреникчилери-биле Вифаниядан Иерусалимче чорупкан. Оларның соондан үргүлчү хөй кижи эдерип чоруур. Иисус мурнунда чаңгыс эвес катап чугаалаан: Иерусалимде ону улуг хилинчек манап турар. А баштай ол тиилелгениң байырлыг чыскаалынга дөмей сагындырган. Өөрүп байырлаан чон тиилелгениң база хосталганың демдээ болур пальма будуктарын чайып, Дээргини уткуп хоорай кыдыынче үнүп келген. Иерусалимниң чурттакчылары Иисусту оларның шаг-шаандан манап чорааны улуг күзелин күүседир деп идегеп турганнар. Бурганның медээчилер дамчыштыр аазап турганы Иудеяның Хааны, Мессия оларны Рим дарлалындан хостаар ужурлуг! Назарет чурттуг Иисус ол Хаан болуп болур!

Дээрги Иисус чүгле мөөң кижилерниң хөөнүн билир эвес, а Бижилгени база билир. Захария медээчини дамчыштыр Иисус дугайында мынча дээн: “Хааның сенче кел чыдыр. Биче сеткилдиг Хааның элчиген, ажылчын элчиген оглу мунуп алган кел чыдыр“. Дээрде Адазының күзел-­соруун бүдүрер дээш Ол өөреникчилерин аныяк элчиген эккелзин дээш, ырак эвес суурже чорудупкан. Олар аныяк элчигенни эккелгеш, хевин аңаа чонай салыпканнар. Иисус элчигенге олурупкан. Кады чораан мөөң чон ыыткыр алгыржып турган:

— Осанна! Дээрги-­Чаяакчының өмүнээзинден кел чыдар Кижи алгадып-­йөрээтсин! Осанна! Өрү дээрде Бурганга алдар-­мактал!»

Бурунгу грек дылда “осанна” деп сөс “Дээрги-­Чаяакчы алгап-­йөрээп, бисти камгала!” дээн уткалыг. Чоннуң бир чамдыызы “Аллилуйя!” деп алгыржып турган, а ол “Бурганны мактаңар!” дээни ол.

Көдүрлүүшкүннүң хөөнү уткуп келген улусту чоорту хаара туда берген. Чон шупту Бурганны алдаржыдып турган:

— Иисус, Сени биске дузалазын дээш Бурганның чоруткан Кижизи Сен!

Иисусту байырлалдыг уткуур дээш, пальма будуктарын кескилеп алгаш, улам күштүг алгыржып турган:

— Сеңээ алдар-­мактал! Бурганның өмүнээзинден келген сен! Бистиң Хаанывыс! Сен биске амыр-тайбың эккелген Сен!

Чамдык улус катангы-­шывыын, плажын уштуп, Иисустуң эртер довурактыг оруунга дөжеп турган. Оларда узун чараш ковёрлар чок, ынчалза-даа Иисус дээрге Бурганның аазааны Камгалакчы-дыр деп көргүзүксээннер. Оларның хааны Ол болур ужурлуг! Өөрүнчүг байырлалга киришкен кижи улам көвүдеп турган. Кайнаар-даа көөрге долгандыр өөрүшкү, көдүрлүүшкүннүг арыннар! Ындыг-даа болза аразында ол өөрүшкүнү үлежиксевес кижилер база бар. Байырлалды хөңнү чок хайгаарап турган кезек фарисейлер Иисуска келгеш чугаалаан:

— Соксат! Сени Хаан деп турарын римчилер дыңнаар болза, таарымча чок чүвеге таваржыр сен. Бо чүнү алгыржып турарын билбес улус-тур. Ыыттаваңар деп чугаала.

Фарисейлер Иисуска адааргап турган, чүге дээрге Ооң бөдүүн чон аразынга ат-алдары олардан артып, сурагжаан. Олар иудейлер караанга салдарын чидирип алырындан коргарлар.

— Чок — деп, Иисус харыылаан. — Олар ыытташпайн барза, даштар алдаржыдып эгелээр. Бурганны олар алдаржыдып-­мактазын! А каш хонук эртерге кымдан-даа ыыткыр алгыржып турган улус өскерлип саттынгаш, Ону кааптарын Дээрги Иисус билип турган. Оларның ынакшылы дыка дүрген көөр хөөн чогу-биле солчур болгаш, Ону крестке хере шаап өлүрерлер.