Согур кижини экирткени

Иисус Бодунуң өөреникчилери болгаш хөй чон-биле кады Иерихондан, Иерусалимче углай үнүп чоруп турда, Вартимей дээр кижи орук кыдыынга олурган. Ону улус шупту билир. Ооң карактары согур, ажылдаар харыы чок болгаш, эрткен улустан диленип амыдырап чоруур.

Вартимей орук кыдыынга хүннүң-не диленип олурар салымынга дыка муңгараар. Ооң улуг күзели делегейни көрүп көрзе: кижилерни, чечек-­чимисти, даглар база шынааларны!

Ол бир катап бир кижиден Иисус согур кижини көөр кылдыр экиртип шыдаар деп турганын дыңнаан. Ынчан Вартимей боданган: “ Иисус мени база экиртипкен болза, дыка-ла эки турган ийик. А Ону мен согур кижи кайыын тып шыдаар мен?”

Бо удаада Вартимей база ол-ла черинге диленип олурганы ол. Ол бир-ле улустуң анаа эвес шимээргеп турарын билип каан. Чүү болуп турарын биликсээш, эрткен улустан дидим эвес айтырган:

— Эйт, чүү болуп турары ол?

— Иисус кел чор! — деп бир кижи харыылаан.

— Иисус?

Вартимей хөлзеп, дүвүреп, ыыткыр алгыра берген:

— Иисус, Давидтиң Оглу! Меңээ дузалап көр! Иисус, мени өршээп, кээрге!

— Ыыттава! –деп, эрткен хөй кижи ону соксадып, кончуп эгелээн. — Алгырарың соксат! Иисусту долгандыр кижи эңмежок чүве-дир. Аңаа чүгле сээң алгың чедишпээн бе!

Кижилерниң оозун-даа тоовайн, Вартимей улам ыыткыр алгырган:

— Иисус, меңээ дузалап көр!

Иисус Вартимейниң алгызын дыңнап кааш, доктаай берген.

— Алгырган кижини Менче эккелиңер! — деп дилээн.

Өөреникчилер Вартимейге келгеш:

— Иисус сени дыңнааш, сээң-биле ужуражыксап тур. Олче чеде бер — дээн.

Вартимей тура халааш, далаш-биле чорупкан. Бир кижи ону чедип алгаш, сыңмарлашкан кижилер аразы-биле Иисуска чоокшулап алырынга дузалашкан.

— Чүнү сеңээ кылып берейн? — дээн ээлдек үн дыңнааш, Вартимей келдирлеп чугаалаан:

— Дээргим! Дыка көрүксеп тур мен!

Иисус харыылаан:

— Карактарың көре берзин! Бүзүрелиң сени камгалап алды!

Вартимейниң карактары ол-ла дораан көре берген. Карак чивеш аразында долгандыр аяс дээр, чырык хүн херели ону бүргеп келген! Ол долгандыр бар бүгү чүвениң янзы-бүрү хевирин, өң-чүзүнүн назынында бир дугаар көрүп турары ол! Чүге-даа деңнешпес, кайгамчык өөрүшкү! Ол ам мурнунда Иисустуң Бодун безин топтап көрүп болур. Ооң арнында ынакшылдың херелденип турарын чүге деңнээр! Ол хире энерелин хайырлаан Иисуска четтиргенин илередир сөстер безин тывылбас!

Ол Бурганны алдаржыдып, бичии уруглар дег өрү шурап, турган. А Иисус өөрү-биле оруун уламчылап чоруптарга, Вартимей база Иисусту эдерип чорупкан.