Иисус бичиилерни йөрээген

Бо болуушкун Иисусту долгандыр чон чыглып сыңмарлажып турган хүннериниң бирээзинде болган. Иисус ынчан база Бурган дугайында, Бурганның Чагыргазының дугайында тайылбырлап, ном-хоойлу тайылбырлакчыларының кажар, чөңгээлиг айтырыгларынга шыдамык харыылап, хөй санныг аарыг кижилерни экиртип турган. Долгандыр кижи-ле хөй. Ол үеде бичии уруглар эдерткен эр, херээжен бөлүк улус Иисусче чүткүп турган.

— Бичии манаңар, кайнаар чүткүп турарыңар ол? — деп бир кижи алгырып үнген.

— Иисусче — деп бир херээжен харыылаан. — Уругларывысты алгап йөрээдип алырывыс ол...

— Уругларывысты де! — деп, чон аразындан бир кижи куду көргензиг алгырган.

— Иисус бичии уруглардан өске кылыр чүве тыппаан бе! Мында эмнедир дээн аарыг кижилер манап турарын көрбес улус силер бе? Ооң Бурган Чагыргазының дугайында чугула чүве чугаалап турарын дыңнавас-тыр силер бе? А силер мында ажы-төлүңер-биле, шаптык болуп, чүнүң-даа утказын билбес, чаа төрүттүнген уругларыңар безин эккелген-дир силер!

— Бичии уругларга шуптузун билири албан эвес-даа болза, оларга Бурганның ынаан эндевес билип каарлар. Ынчангаш Иисусту дилээр бодап тур мен, Ол…

— Ол үнелиг үезин силерниң ажы-төлүңерге чарыгдаар чүве бе?! — деп бир кижи үзе кирип, хыйланган.

— Дилеп тур бис, бисти эрттирип көрүңер!

— Чаш уруглар Меңээ кээп турзун, оларга шаптыктап, Менче кээрин хоруваңар! Чүге дээрге Бурганның Чагыргазы оларныы боор!

Өөреникчилери кайгап, Иисусче көргеннер. А ажы-төл эдерткен ада-ие амырап, сыңмарлашкан кижилер аразы-биле Иисусче эрте берген. Өөреникчилер арай бүзүревейн чүү болурун көөр дээш база чоокшулай берген.

Иисус оларга чугаалаан:

— Алыс шынны силерге чугаалап тур мен: Бурганның Чагыргазын чаш төл дег хүлээп албас кижи канчап-даа ынаар кирбес! Бурганның ынакшылынга чаш төл дег ынанып шыдавас кижи Дээрниң Чагыргазын салгап шыдавас.

Оон Иисус ээлчег-биле чаштарны холунга алгаш, алгап йөрээгеш, а элээдилерин баштарынга холун салгаш алгап-­йөрээп турган.