Читкен хой дугайында угаадыг

Иисус бир катап ном-хоойлу тайылбырлакчыларынга база фарисейлерге мындыг төөгү чугаалап берген.

Бир кадарчы кодан хоюн аажок харыысалгалыг ажаап-­карактап турган. Ол чүс хоюнуң чаңгызы-даа үстүп, чиде бербезин дээш үргүлчү оларын четчелээр, малга дыка ынак. Хүнзедир одарлыг черге хойларын кадарып, кежээ тодуг-­догаа коданга ээп келзин дээш кадарчы дыка кызар. Ол бир кежээ аалынга хоюн киирип келгеш санаарга тозан тос баш болган.

Кадарчы катап база санаан — катап база тозан тос! Бир хой чок бооп турар — чалым хаядан чуглу берген бе азы кокай тудуп чипкен бе? Канчап-даа тургаш, ону тывар ужурлуг!

Хойларының аразынче кирип, кичээнгейлиг хынааш, думчуунда каралыг, бичии хураган читкенин билип алган.

Кажаазының эжиин эки быжыглааш, хураганны дилеп чорупкан. Тозан тос хойлары ээн аалда артканы дүвүренчиг болбайн канчаар, ынчалза-даа кадарчының өске аргазы-даа, үе-даа чок, минута бүрүзү үнелиг, хураганны өлүмнүг айыыл манап турар.

Сагыш човаан кадарчы күжү төнүп турупкан-даа болза, дыка дүрген дагга хой кадарып чораан черинге маңнап келген. Оожургаан херээ чок — дилээри чугула. Хураган былгырары дыңналып кээр бе дээш, ол кезек болгаш-ла доктаап, хураганын кый деп алгыргылааш, дыңнааланып чораан. А харыызынга чүгле сүүрлерде чаңгы дыңналыр…

Хаядан-на чуглу бербес болза! Ол кокпа оруктап даг кырынче үне маңнап, катап-­катап хүраганын кый деп турган.

— Бэ-э-э-э! — деп, хүраганның арай боорда дыңналыр үнү ырактан дыңналган.

Дүвүреп халаанындан тиккиледир соккан чүрек, ам өөрүшкүден хөректен ушта шураар чыгыы. Хураганы дириг!

Ол дораан хураган бээлээн угже углапкан. Читкен дөтпежик тывылган! Кадыр чалым хаяда кыстына берген дириг амытан ыңайда, бээрде чок турган.

Кадарчы кадыр хая эриинден ол-бо талаже хураганга кайы талазындан чеде бээрин өөренип көргеш:

— Айыылдыг-даа болза чедип болур-дур — деп түңнел кылган.

Кадарчы аяар хаяны куду баткаш, хураганын эгинге салгаш, дагның кырынче оваарымчалыг үнүп келген. Өөрүнчүүн! Ээзиниң мойнунче хураганның улам чоок сиңнигип чоруурун бодаарга, камгалал алганынга ол база амыраан хевирлиг.

— Оон ырай берген кижилерни Бурган база ынчалдыр дилеп, тып турар — деп, Иисус чугаазын түңнээн. — Силерге чугаалап тур мен: дээрлерге „Миннир ужурлуг бачыдым чок“ дээр тозан тос кижиге бодаарга, бачыдын миннип, Бурганче ээлген чаңгыс-ла бачыттыг кижи дээш, өөрүшкү улуг болур.