Иисус Вифанияда

Иисус Иерусалимге келген санында Вифания суурга үргүлчү кирер турган. Ол суур Иерусалим чоогунда каш-ла километр черде. Орта келгеш ол чер чурттуг өөреникчилериниң база чоок өңнүктери Мария, Марфа база Лазарьның бажыңынга доктаар турган.

Иисус бир кээрге Мария Иисустуң чанынга олурупкаш Ону дыңнап эгелээн, а Марфа аъш-чем белеткеп дүвүреп турган. Элээн үе эрткенде Марфа Иисуска чоокшулап келгеш мынча дээн:

— Дээрги! Дуңмамның хамык ажылды менче чууй каапкаш олурары Силерге сагыш чованчыг эвес-тир бе? Меңээ дузалашсын деп аңаа чугаалап көрүңерем.

Иисус аңаа ээлдек харыылаан:

— Марфа, Марфа! Сен хөй-ле чүве дээш сагыш човап, дүвүрээр-дир сен. А херектиг чүве чүгле чаңгыс. Мария эки, шын үүлени шилип алган-дыр, ону ам оон кым-даа хунаап шыдавас.

Улуг Башкы чүнү чугаалаксааны ол? Амыдыралда ийиги чергениң айтырыгларынче хөй кичээнгей салбазын Ол Марфага база шупту кижилерге айтып бериксээн. Марияга дөмей Марфа база Бурганның өөредии чиир чемден канчап-даа үнелиг деп билир ужурлуг турган. Иисус Христоска бүзүрел чүүден-даа дээре — ону кым-даа узуткап шыдавас, а черде чуртталга төнер. Ол дээрге бо черге чуртталгаже шуут сагыш салбазын дивээн болбайн канчаар. Кижи бүрүзү хүлээлгелиг, кижи бүрүзү сорулгалыг! Ындыг-даа болза ол айтырыглар Марфаның чижээнде дег, кижиниң Бурган-биле чуртталгазындан эртпес ужурлуг. Ол үеде Марфага кол айтырыг аъш-чем салып делгээри Камгалакчының сөстеринден үнелиг апарган-дыр.