Беш муң кижини тоттурганы

Иисус чон-биле хүнзедир соксаал чок чугаалашкан. Ооң чүгле эр дыңнакчыларының саны беш муң чыгыы, а херээженнер болгаш бичии уруглар база оон эвээжевес. Иисус оларга чүгле суртаалдавайн, а келген аарыг кижилерни база экиртип турган.

Кежээликтей, хүн ажып турда, өөреникчилери Иисуска чедип келгеш, мынча дээн:

— Башкы! Улусту чорудуптуңар, аъш-чем тып алзыннар

Иисус харыызынга оларже хүлүмзүрүп көрген:

— Боттарыңар оларны чемгериңер!

— Бисте чүгле беш хлеб-биле ийи балык бар-дыр, кай, бо хамык улуска четчир аъш-чем садып эккээр бис бе? — деп, Филипп харыылаан. — Чоокта чүү-даа чок ээн чер-дир, акшавыс база эвээш.

Иисус оларга харыылаан:

— Меңээ ол хлебти база балыкты эккеп бериңер. Иисус хлебтерни база балыкты алгаш, ол дээш Бурганга четтиргенин илередип, алгап-­йөрээрин дилээн Ол хлебти кезектей үзе тырткылааш, өөреникчилериниң белен тудуп алган турган корзиналарынга салгылапкан. Балыкты база ынчалган.

Өөреникчилери чүү болу берди дижип, карактарын дүрбүүр болган. Чаңгыс корзина хлеб база балык-биле дола берген болза чүү дээй эртик! А ам корзиналар шупту долу! А кажан бөлүк-­бөлүк олургулапкан улуска үлээрге, корзинада хлеб база балык сыыгавас, долу хевээр. Чем кижи бүрүзүнге тоттур чииринге чедишкен.

Чогум черле Иисус кандыг кончуг Кижи дээр сен? Мындыг кайгамчык чүвелер кылыр күжү кайын кээп турар дээр сен?

— Бөлүктерни долгандыр артып калган чемни чыып эккелиңер, чүү-даа хей барбас ужурлуг — деп, Иисус Бодунуң өөреникчилеринге чугаалаан.

Оларның чыып эккелген чеми шуптузунуң хаактан аргаан хааржактары долу, эгезинде турганындан каш катап көвей болган.

Оларның карактарынга көзүлдүр болган кайгамчык болуушкунну көргеш, шупту кайгап ханмайн чугаалажып турган:

— Бо черге келир ужурлуг ёзулуг Медээчи — Ол-дур.

Ынчалза-даа беш муң кижиниң аразында Иисустуң чүнү чедириксээнин билип шыдаваан кижилер база бар. “Иисус аъш-чемни ындыг белен тыптар болганда, биске чем дээш ажылдаан херээ чок тур. Ону хаан кылдыр олуртуп алыылыңар, ол бистиң хереглээр чүвевистиң дөгерезин хандырзын”.

Иисус оларның күзелин билген, ынчалза-даа Ол черге хааннаар сорулга-биле келбээн-не болгай. Ынчангаш Иисус оларга көзүлбейн, кижи шаптыктавас черге барып Адазынга мөгейип, тейлээр дээш дагже чорупкан.

Чыылган чон аалдарынче тарай берген. А чамдыктарының Иисустан хөңнү кала берген.