Даңгыраглаан чурт

Нойнуң оолдарының ажы-төлү өзүп-көвүдеп, бүгү чер кырынга тарап көшкүлей берген. Олар арыг арын-нүүрлүг азы каржы-бак турган бе? Бурган оларга көзүлбес, ынчангаш оларның хөй кезии Бурганны уттупкан. Олар ыяштан, даштан дүрзү, статуя хевирлиг меге бурганнар чогааткылап алган. Оларны чер бүрүзүнге тургускулап алгаш, ол дүрзүлерниң баарынга доңгая дүжүп, оларынга тейлеп чугаалаарлар: “бо бисти чаяап каан бурганнарывыс-тыр, олар биске аъш-чем берип турар”.

Үелер эрткенде черде кижилерниң көвей кезээ дүрзү бурган чүдүкчүлери апарган. Олар Бурганга эвес, а идолга мөгейип турар. Ол дүрзүлеринден деткимче манап, боттарынче көрүндүрүп алыр дээш, болганчок-ла оларын алдын азы мөңгүнден база кылгылаар.

Кижилерни Оон хая көрүнгеш оларның дүрзүлерге мөгейип турарын Бурган көрген, оларга килеңнеп турган. Ынчалза-даа оларны Бурган узуткаваан, чүге дээрге бүгү кижилерниң бачыдын алгаш, өлүр дээш Камгалакчы келир.

Бурган Бодунга чоок чон чаяап алыр дээш чаңгыс кижи шилип алган. Ооң ады Авраам. А Авраамның үре-салгалындан бо делегейге Камгалакчы келир ужурлуг.

Дээрги Бурган Авраамга чугаалаан:

— Бодуң чериңден көжүп, төрел-­аймааң, адаң аалын каггаш, Мээң айыткан черимче чорувут; Мен сенден эңмежок хөй чон чаяар мен, сени алгап-­йөрээр Мен, адыңны алдаржыдар Мен.

Авраам кадайы Сара-биле ырак, берге орукче чорупканнар, Оларның-биле Авраамның чээни Лот кады чорупкан.

Дээрги-­Бурган Авраамга Ханаан черинче орук айтып берген. Ынчан Авраам база катап Бурганның тода үнүн дыңнаан:

— Бо чуртту Мен сээң үре-салгалыңга бээр мен.

“Мээң чедер ужурлуг черим — Ханаан ол-дур” деп билгеш, чедип алыр сорулгазы чоокшулап келгенинге Авраам аажок амыраан. Бурганга өргүл салыр дээш, ол өргүл одаа кылып алган.

А үре-салгал дугайында Бурганның чугаазының утказын Авраам билбээн. Сарра-биле оларның ажы-төлү чок-ла болгай. Ынчалза-даа Бурганга ооң бүзүреп ынаныры хевээр.

Дээрги-­Бурган Авраамга чаңгыс эвес катап чугаалап турган: “Алгап-йөрээр мен, Мээң камгалалымга чоруур сен, кым-даа сеңээ каржы хора чедирип шыдавас”. Бурган Авраамга таарзынып, ону “өңнүүм” деп адаан.