Далайда шуурган

Бир кежээ Геннисарет хөлдүң эриинге Ону дыңнаар дээш чыылган улуска өөредиин доозупкаш, Иисус өөреникчилеринге чугаалаан:

— Хөлдүң ол чарыынче эжиндире берээлиңер.

Өөреникчилери хемезин белеткээш, Иисус-биле кады хемеге олурупкаш, үнүпкеннер.

Иисус хүнзедир турупкан болгаш, хемениң соңгу кезээнге дыштанып чыдыпкан. Хенертен улуг шуурган эгелей берген, ындыг шуурган Геннисарет хөлүнге бо-ла болгулаар. Өрү көдүрүлген чалгыгларның күштүүнден хеме сугже дүжер чыгыы. Байдалдың ондактыын билгеш, корткан өөреникчилери Иисусту оттурупканнар:

— Дагдыныкчы! Бистиң дүжүп өлүрүвүс Сеңээ хамаарышпас чүве бе?

Иисус туруп келген. Ол калчаараан чалгыгларны көргеш, шуурганның сыыладыр эдип, хемени ол, бо талаже чайгап турганын көргеш,

бойдустуң ол халавын хоруп, дужааган:

— Сокса! Ыыдың чидир!

Ол дораан шуурган оожургап, далай кыры дески, кылаң көрүнчүк-ле…

Элдеп чүве! Шуурганның хенертен соксап турганын кым-даа көрүп көрбээнден аңгыда, чалгыглар база чоорту чавырлыр турган-на болгай. А бо удаада карак чивеш аразында — ыржым, шыпшың оожургал! Өөреникчилер ындыг чүве көрүп көрбээннер. А Дээрги олардан айтырган:

— Чүге ындыг кортук силер? Силерниң бүзүрелиңер кайы чүвел, чегей бүзүрелдиглер?

Олар кайгап-­магадааш база коргуп-­сүртээш, удур-дедир бот-боттарындан айтыржып турганнар:

— Суг-биле шуурганны безин дужаарга, Аңаа чагыртып турар — бо чогум Кымыл?

Оларның бүзүреп хүлээп алган Башкызы — Бурган Оглу-дур — деп угаан-биле билип шыдавааннар.