Дулгуяк кадайның оглун диргискени

Иисус Галлилеяның Наин хоорайынче чоруптарга Ону мөөң чон база-ла эдербишаан. Иисус хоорайның хаалгазынга чоокшулап кээрге, кижи ажааган улус уткуштур үнүп келген. Өлген кижиниң чытканы носилка соондан ажыынга туттурган херээжен, а ооң соондан качыгдалын үлешкен бөлүк чон чоруп орган. Ол херээжен дулгуяк, а өлген кижи ооң дың чаңгыс оглу чүве-дир.

Иисус ол херээженниң кайы хире качыгдаанын көргеш, кээргеп чугаалаан:

— Ыглавайын көр!

Иисус кылаштап баргаш, өлүг мага-бот салган хааржакка дээптерге, ону көдүрүп чораан улус тура дүшкен. Ол ынчан өлген оолга:— Аныяк оол! Сеңээ чугаалап тур мен: туруп кел! — дээрге, өлүг чыткаш, дирлип келген кижи ковайгаш, чугааланып эгелээрге, Иисус ону иезинге хүлээдип берген. Кайгамчык-ла чүве!

Улус шупту кезек коргуп-­сүртеп тургаш, оон Бурганны алдаржыдып:

— Өндүр улуг медээчи биске чедип келди! Бурган Бодунуң чонун бодап келген-дир! — деп турганнар.

Чыылган чон Бурганны алдаржыдып, алгап йөрээп турган. А Наинге болган элдеп-эзин болуушкун бүгү Иудеяга дыка дүрген тарай берген.