Аарыг херээженни экирткени

Иисус Капернаумче хемелеп кежип кээрге, ону мөөң чон манап турган.

Хөй чон Ооң соондан эдерип чорааннар. Ону долгандыр хөй иткилешкен чон аразынга хоорайның чиңге кудумчулары-биле эрттери Иисуска база амыр эвес. Ол үеде Иисус доктаай бергеш айтырган:

— Меңээ кым дээпти?

Ол күжү үне бергенин эскерип каан. Өөреникчилери кайгап чугаалааннар:

— Башкы! Мөөң чон Сени үглеп алган, кызып-­кыйып, ызыртыр сүрүп чоруур-дур. А Сен канчап кым дээпти деп айтырарың ол?

Иисус оларның айтырыынга харыылавайн, Аңаа кымның дээпкенин дилегзинип көрген.

Хөй чон арзынга он ийи чыл дургузунда ханы төктүп аараан херээжен база турган. Ол эмчилерге бүгү эт-хөреңгизин төлевирге берипкен-даа болза, ооң аарыын чаңгызы-даа экиртир эмнеп шыдаваан. А Иисустуң кайгамчык ажыл-херээн дыңнааш, ону база экиртиптер деп идегээн. “Ооң хевиниң эдээнге-ле дээпсимзе экирий бээр мен!” деп бүзүрээш, Дээргиге көзүлбейн артындан келгени ол. Иисустуң экиртип шыдаарынга херээженниң бүзүрели чайгылыш чок! Өндүр бедик Башкыга чүгле дээпкен дораан экирий бергенин ол билип каан.

Иисус кымның экирээнин билген, ынчалза-даа херээженниң боду Аңаа чоокшулап кээрин манап турган. Херээжен чедип келген.

Ол сири-кавы чоокшулап кээп, Иисустуң мурнунга кээп дүшкеш, чүге Аңаа деггенин база канчап ол дораан экирий бергенин хөй улус мурнунга чугаалап берген.

Харыызынга ол Иисустуң ынакшылдыг сөстерин дыңнаан:

— Кызым, бүзүрелиң сени экиртип, камгалап кагды, амыр-тайбың чорувут!