Кежи аарыг кижини экирткени

Иисус черге Бодунуң бараалгал ажылының үезинде кодан хоорайларны кезип, аарыг-­аржык улуска ужуражып, оларны эмнеп турган. Ынчан Палестина чурттакчыларының аразынга халаптыг кеш аарыының нептеренгей үези турган, ону проказа дээр. Ол кештиң эмнеттинмес халдавырлыг аарыы.

Бир катап Иисус өөреникчилери-биле Галлилеяның бир хоорайынга турда, кежи аарыг кижи чедип келген. Иисусту көрүп кааш, Ооң мурнунга ол доңгая кээп дүшкеш, мынча деп ээрежип эгелээн:

— Дээрги! Күзээр-ле болзуңарза, мени экиртип, арыглап каап шыдаар силер.

Ол кижиниң Иисуска идегеп турарын чүге деңнээр!

Дээрги холун сунгаш, аарыг кижиге дээскеш:

— Күзеп тур мен, арыгланы бер! — дээн.

Ол сөстер Иисустуң чүгле анаа күзээни эвес, а Бурган дужаалы болуп турар. Бургандан өске кым-даа ындыг чүве чугаалаарын дидинмес!

Кайгамчыктыг элдеп чүве: кеш аарыы ол кижиден сойлуп калган. Иисустуң мурнунда арыг кештиг, каң-кадык кижи турган.

Иисус ол дугайын улуска дыңнадырын күзевээн, а харын моон чоруткаш, Бурганның бараалгакчызынга көстүп каар, оон Моисейниң хоойлузунда айытканын ёзугаар, арыгланганы дээш Бурганга өргүлден кылырын сагындырган.

Ынчалза-даа Иисустуң дугайында дамчыыр чугаа улам нептереп, Ону дыңнаар, база аарыг-­аржыын экиртир дээн улус Олче мөөңү-биле кээп-ле турган.