Эгээрттинмес балык тывыжы

Бир катап Иисус Геннисарет хөл эриинге Буянныг Медээ чугаалап турган. Ону сонуургаан кижиниң хөйүнден Ол эриктен ырадыр хемеге эжиндире бергеш, өөредиин уламчылаар ужурга таварышкан. Ынчан Ону кижи бүрүзү көөр аргалыг болгаш, утказы билдинип турар. Өөредиин доозупкаш, Иисус Пётрга чугаалаан:

— Хөлдүң ортузунче эжиндире бергеш, четкиң сугже октавыт, хөй тывыштыг боор сен.

— Ам бо дораан? Хөл ортузунче?

Дуржулгалыг балыкчы Петр эки билир: бирээде, дүъш үезинде кым-даа балыктавас, ийиде, хөл ортузундан кым-даа балыктавас, чүге дээрге ында терең болгаш, четки хөлдүң дүвүнге четпес. Балыктаарынга дүвү дески эрик чоогу суг тааржыр.

— Башкы, бис дүннү өттүр балыктааш, чүнү-даа тудуп албадывыс — деп Пётр харыылаан. — Ынчалза-даа Силерниң айтыышкыныңар-биле кылып, хөл ортузунче эжиндире бергеш, четкилерни салыптайн.

Андрей база Пётр хемеге олурупкаш, эриктен эжиндирипкеннер. Иоанн база Иаков өске хемеге оларның соондан эжиндирипкен. Ол балыктаашкын чүнүң-биле төнерин аажок сонуургааннар. Хөлдүң ортузунче эжиндирип келгеш, Пётр-биле Андрей четкизин октапкаш, терең сугже четтикпейн көрүп турганнар. Удаткан чок сугда хөй балыктың мөңгүннелчек казырыы бырлаңнап хайныга берген. Балыкчылар аваангыр четкиниң ужундан быжыг тудуп алгаш, сугдан үндүр тыртып эгелээннер. Четкиниң аарын бодаарга олча эгээрттинмес хевирлиг! Олар ийилээ күш четпейн Иаков-биле Иоанны дузалажырынче кыйгырганнар.

Олар дөртелээн четкиде балыкты арай боорда сугдан үндүр тыртып алгаш, ийи хемени балык-биле сугже дүжер чыгыы кылдыр чык долдур чүдүрүп алганнар. Четкиниң чамдык карактары безин орлугулап каан.

Кижи бүзүрээр арга чок! Ол хире көвей балыкты олар кажан-даа тудуп көрбээн! Ону көрген улус магадап ханмайн турганнар, а Симон Пётр Иисустуң мурнунга дискекке ора дүшкеш, коргуп чугаалаан:

— Мени каапкаш барыңар, Дээргим! Чүге дээрге бачыттыг кижи-дир мен!

А Иисус ооң эктинге холун салгаш, мынча дээн:

— Кортпа, моон соңгаар сен балык эвес, а кижилер тудукчузу болур сен.

Иисустуң өөреникчилери хемезин эрикче үндүр тыртып кааш, ында улуска эгээрттинмес балык олчазын аайлап алырын дааскаш, боттары Иисустуң соондан чорупканнар.