Кудукка ужуражылга

Бөлүк чорумалдар изиг хүндүс орукка чораан деп, даап бодап алыылыңар. Олар Сихарь хоорай кыдыынга, каш чүс чылдар бурунгаар Иаковтуң казып кааны кудукка келгеннер. Чорумалдар Иисус база Ооң өөреникчилери-дир деп танып кагдывыс. Дүштеки чем үези чоокшулап келген, ынчангаш Башкызы өөреникчилерин хоорайдан чем саттырыпкаш, а Боду кудук чанынга артып каан.

Дал дүъш, хүн өрү бедик. Ол үеде кудуктан улус суглавас турган-даа болза, хоорайдан доңга туткан бир херээжен кудуктан суглап келген.

Херээжен кудуктан суг узуп турда, Иисус:

— Сууңдан Меңээ берем — дээн.

Иудейлер самаряннар-биле харылзашпас-ла болгай, а ол иудей кижи канчап ооң-биле чугаалажы бергенин херээжен кайгап ханмаан. А Иисус ооң чүрээн билир болгаш, аңаа дузалаксааш, ол херээжен-биле чугула кол айтырыглар дугайында чугаалашкан: бүзүрел база Дээрги-­Бурганга канчаар шын мөгейериниң дугайында. Иисус мынча дээн:

— Бурган көзүлбес, ындыг болганда Бурганга мөгейер дээн кижи чүрээниң ханызындан, шын сеткили-биле мөгейип тейлээр ужурлуг.

Бурганга мөгейери кижиниң турар черинден хамаарышпас деп, Дээрги аңаа чугаалаксааны ол. Бурган-­Чаяакчыга каяа-даа тейлеп болур бис, чүге дизе Ол хары угда кайда-даа бар. Самарий херээжен дыка кичээнгейлиг дыңнап турган, Ыдыктыг Сүлде Иисустуң сөстерин билип алырынга дузалаан. Ол херээжен үр үеде алыс шынны дилеп чораан, ынчангаш ол мынча дээн:

— Христос деп база адаар Мессия кээр ужурлуг деп билир мен. Ол чедип келгеш, биске шупту чүвени тайылбырлап бээр.

Аңаа Иисус мынчаар харыылаан:

— Ол — Мен-дир мен, сээң-биле чугаалажып турар. Херээжен алыс шынны билген, ам чүгле Ол

— Камгалакчы-дыр деп бүзүрээри чугула. Самарий херээжен өөрээнинден шупту улуска ол дугайын чугаалаар дээш далаш чорупкан. Ол аңаа мөңгеде суксатпас дириг суг берген Камгалакчыга ужурашкан болган.

Херээжен "Мен Христос мен" деп чугаалаан Кижини барып көөрүнче кыйгырарга, Сихарьның чурттакчылары хөлзеп, дүвүреп Иисусче маңнажыпканнар, чүге дээрге олар база Мессияны көрүксээннер.

Иисус ол херээженниң эрткен чуртталгазын шуптузун билир деп херечилээн сөстерин дыңнааш, дыка хөй самарийжилер Дээрги Иисуска бүзүрээннер.

Иисуска ужурашкаш, Ону оларның хоорайынга артып каарын дилеп турганнар. Иисус ийи хондур хоорайның чурттакчылары-биле чугаалашкан. Аңаа оон-даа хөй кижи бүзүрээш, демги херээженге мынча деп турганнар:

— Бистиң бүзүрей бергенивис ам чүгле сээң чугааларыңдан эвес, а бис боттарывыс ам Ону дыңнаан болгаш, Ол ылап-ла бо делегейниң улузунуң Камгалакчызы-дыр деп билдивис.