Дүнеки аалчы

Ол Пасха байырлал үезинде Иисус дыка хөй кайгамчыктыг чүүлдерни кылган болгаш, эвээш эвес кижи Аңаа бүзүрээннер. Ону Мессиязы, Камгалакчызы кылдыр колдуунда ядыылар хүлээп ап турган, а байлар дадагалзап, Аңаа чигзинер болган.

Ындыг-даа болза Иерусалимге бир кижи Бурганны хереглеп, дилеп чораан. Иисустуң Боду-биле улус чок черге ооң ужуражыксаары аажок. Хүндүс ужуражырындан ол дидинмес, чүге дээрге ол ат-сураглыг, синедрион (шажынның дээди чөвүлели) хүндүлүг кежигүнү, эртем билиглиг, фарисейлерниң чүдүлге партиязынга хамааржыр чүве-дир. Ону Никодим деп адаар.

Долгандыр турар кижилеринден эпчок чүвеге таварышпас дээш, ол Иисуска караңгы дүне келген. Бажыңга кирип келгеш, мынча дээн:

— Башкы! Силерни Бурганның бисче чорутканы башкы деп билир бис. Чүге дээрге Бурганның дузазы чокта, кым-даа Силерниң кылып турарыңар дег кайгамчык чүүлдер кылып шыдавас.

Никодим Иисусту улуг Башкы деп билзе-даа, а Ол — Бурган Оглу деп билбээн. Ынчангаш Иисустуң чугаалаан чүвези аңаа шуут чаа медээ болган:

— Алыс шынны сеңээ чугаалап тур мен: чүгле үстүкүден катап төрүттүнген кижи Бурганның Чагыргазын көрүп шыдаар — деп Иисус харыы берген.

Ону билип алыры Никодимге берге боорга, Иисустан ол айтырган:

— Кырый берген кижи канчап катап төрүттүнерил? Таанда-ла катап чаш төл болу бээр бе?

Иисус аңаа кижи катап үстүкүден чүгле Бурганның Сүлдезинден катап төрүттүнер ужурлуг деп харыылаан. А ону билип алыры Никодимге берге болган. Ынчангаш Дээрги Иисус аңаа чүнү чугаалап бериксээнин тайылбырлап берген:

— Кижи бүрүзү бачыттыг, ынчангаш ол боду шынның кижизи болуп шыдавас. Ол чүгле Ыдыктыг Сүлде дузазы-биле чаартынып, өске кижи апарып болур.

Ол канчаар болуру кижиге билдинмес чажыт болуп турар. Иисус ону тайылбырлап, Никодимге чугаалаан:

— Хат хадыырга сен ооң даажын дыңнаар сен, а ооң кайыын келгени, кайнаар баары сеңээ билдинмес. Кижиниң Сүлдеден төрүттүнери база аңаа дөмей.

Никодимге Иисустуң ол сөстери ам-даа билдинмээн, ынчангаш ол хөлзеп алгыра каапкан:

— Ол канчап ындыг боор чүвел?

Иисус аңаа кижини чүгле Бурган Оглунга бүзүрели шынның төлээзи болдуруп шыдаар болгаш, кижилерниң бачыды дээш өлүмнү алзын дээш,

Бурган Бодунуң Оглун чорудупкан деп Ол тайылбырлаан:

— Бурган Бодунуң Оглун бо делегейже айбылап чорударда, бо делегейни шиидер дээш эвес, харын Ону дамчыштыр камгалаар дээш чоруткан.

Удавайн Никодим Дээрги Иисуска бүзүрээн болгаш Сүлде дамчыштыр үстүкүден төрүмел алган. Ынчан ол Бурган Оглунга бүзүрелин улуска чугаалаарындан кортпас, а харын-даа дайзыннар халдаарга Иисуска болчур турган.