Бурганның өргээзин бирги арыглааны

Канадан Иисус авазы, дуңмалары болгаш өөреникчилери-биле кады Галилея далайда өртээл хоорай Капернаумга келгеш, аңаа элээн каш хонганнар. Ооң соонда Иисус Иерусалимде Пасха байырлалынче чорупкан.

Бурган өргээзиниң шөлүнде кижи сыңышпас хөй. Ында чүгле Бурганга өргүл кылып мөгейип тейлээр дээн улус эвес, а садыг-­саарылгы кылыр дээш келген улус база хөй. Байырлалга келген кижиниң хөйүн ажыглап, боттарының олча-ажыын бодап садыг кылган, акша адырыктап солаан улусту көргеш, Дээрги Иисус килеңнеп турган. Өргээниң девискээри базар шөлү болу берген, Бурганга кандыг-даа хүндү, коргуушкун чок! Көге-буга саткан улуска Иисус:

— Ооңарны моон ырадыңар! Мээң Адамның өргээзин садыг-­саарылга чери кылбаңар! — деп дужааган.

Садыгжылар удурланыр харыы чок, далаш-биле өргээниң девискээрин каггаш чорупканнар. Акша солукчулары база Дээргиниң авторитедин билгеннер. А Ол акша солукчуларының столдарын аңдара октап, акшазын тө чашканнап каапкан. Улус шупту Иисустуң чүнү канчап турганын көргеш, Аңаа удур чүнү-даа чугаалап дидинмээннер.