Вавилон суургазы

Бүгү делегейге болган суг халавының соонда Нойнуң оолдары Сим, Хам, Иафет төрээн ажы-төлдүг, уйнуктарлыг өзүп көвудеп хөй санныг апарган. Ол үеде кижилер назыны суг халавының мурнунда турганындан кыскалаан. Ной 950 хар чурттаан болза, ооң оглу Сим 600 чыл, а Симниң оглу 430 чыл чурттааннар.

А Нойнуң үре- салгалы черни долдуруп, тарап көжериниң мурнунда дараазында төөгү болган. Чөөн чүкке келгеш, кижилер Сенаар черинче көшкеннер. Олар шупту чаңгыс дылга чугаалажыр турган. А бир катап олар план тургузуп, аразында сүмелешкеннер:

— Дойдан тууйбулар кылгаш, изиг отка өрттедип алгаш, дээрге чедир бедик суургалыг хоорайдан тудуп алыылыңар. Чырык черге тарай бээриниң мурнунда адывыс алдаржыдып алыылыңар.

Оларның чүректеринниң улуургак-­турамыын Бурган көргеш, чугаалаан:

— Черже дүжүп баргаш оларның дылын холуштуруптайн. Ынчан оларның утка чок, бардам планындан чүү-даа үнмес.

Доп-дораан кижилер аңгы-аңгы дылдарга чугаалажып эгелээш, бот-боттары аразында билишпес апарган. Чугаазын билишпезинден будалып эгелээш, тудугну соксадыр ужурга келгеннер. Ооң соонда Дээрги-­Чагырыкчы оларны черниң бүгү чүктеринче тарадыпкан, а ол хоорай Вавилон деп “холуп каан” деп уткалыг ат алган.

Вавилон суургазының төөгүзү биске ынчалдыр аңгы-аңгы дылдарның тывылганын тайылбырлап турар.