Канага болган куда дой

Иисус өөреникчилери-биле Галилеяга келгениниң үшкү хүнүнде Кана деп бичии хоорайга куда дою болган. Иисустуң авазы Мария база аңаа келген. Куда дою аажок хөглүг өөрүшкүнүң байырлалы: чыылган чон ыр-шоорлуг, каткы-­хөглүг, оюн баштак, солун чугаалажып, өгленишкеннерге байыр чедирип турганнар. Иисус эштери-биле база аңаа киржип турган. Куда орту кирип, кидин-­түлүк хөглээшкин үезинде, Мария Иисуска келгеш сымыранган:

— Арагазы төне берди.

Харааданчыг-дыр! Аалчылар күдээни харам деп бодаар чадавас. Иисус ол байдалдан үнер арганы тыптар деп Мария идегээн боор, а авазы Марияның Иисустан чүнү канчалзын деп манап турарын Ол билген.

— Менден чүнү манап тур сен, авай? Мээң үе-шагым ам-даа келбээн-не болгай.

Дээрги Иисустуң чүнү чугаалаанын Мария билген, а Иисус чүнү-даа кылып шыдаар деп ол бүзүрээр. Ынчангаш Мария арага кудукчуларынга баргаш оожум чугаалаан:

— Мээң Оглум силерге чүве чугаалаза, Ооң айыткан аайы-биле кылыңар.

Шынап-ла удаваанда Иисус дашка тудукчуларынга келген. Ол мурнуку өрээлди долгандыр көргеш, дойдан кылган алды улуг куруг доскаар көрүп каан.

— Доскаарларны суг-биле долдуруптуңар — деп ажылдакчыларга дааскан.

Ындыг улуг саваларны долдурар дээш эвээш эвес күш үндүрген, а оларны долдуруптарга:

— Ындыг-дыр, а ам оон куткаш, куда башкарыкчызынга аппарып бериңер, амзап көрзүн — дээн.

Чалчалар карактарын хере көрүп алган, аайын тыппайн көрүп алгаш турганнар. Ол чүү деп турары ол? Куда башкарыкчызы кудуктан эккеп кудуп каан сугну амзаар чүве бе? Назарет чурттуг бо аныяк кижи ону кочулаар дивээн бе? А оон Марияның “Оглум чүү дээр болдур, кандыг-даа болза, ону күүседиңер” дээнин сактып келгеш, күүседир деп шиитпирлээннер.

Куда башкарыкчызы кирип келгеш, доскаарда сугну хымыш алгаш узуп ишкеш:

— Хм-м, — деп, ол чүүлдүгзүнүп бажын согаш кылгаш, күдээниң чанынче далажыпкан.

Күдээ ыядып, куду көрүп алган боданып турган: “Арага четпейн барган дээш, ам мени чемелээри ол-дур”.

А куда башкарыкчызы сыр өске чүве чугаалаан:

— Шупту улус баштай эки арагазын кудар, а оон улустуң эзирээнин ажыглап, багайын кудар болгай. А сен дедир кылган-дыр сен. Куда дашказы тудукчуларының ам кудуп турар арагазы эң эки шынарлыг-дыр!

Күдээ чугааның утказын орта билбейн барган. А Иисустуң авазы Мария хүлүмзүрүп, Оглунче көрген, а Ооң өөреникчилери: “Кижилерге дузалашсын дээш, Бурган Боду Иисусту чоруткан-дыр” деп билгеннер.