Иисус туңбаштайгы өөреникчилери

Иоанн Медээчиниң Дээргини чонга херечилеп турган хүнүнүң дараазында хүнде, Иисус катап база Иордан хемге келген. Иоанн ол өйде өөреникчилери Андрей база Иоанн-биле чугаалажып турган. Ол Иисусче айыткаш чугаалаан:

— Бурганның Хураганы ол-дур, көрүңерден.

Ол Андрей-биле Иоанга ооң-биле артпайн, а оларга ёзулуг эки Башкы болур Христостуң соондан чорупсун дээш, ынча деп чугаалааны ол. Андрей, Иоанн ийи Дээрги Иисусту эдерип чорупканнар. Иисус хая көрнүп келгеш, Бодунуң соондан оларның чоруп орарын көргеш айтырган:

— Чүнү херегледиңер?

— Башкы! Силер кайда чурттап турар силер? –деп олар айтырарга, Иисус оларга:

— Бараалыңар, көрүп аар силер — дээн.

Андрей база Иоанн Иисусту эдерип, Ооң чурттап турган бажыңынга келгеш, кежээни Ооң-биле эрттиргеннер. Иисус-биле хөөрежирге өөрүнчүүн чүү дээр! Оларның-биле кым-даа, кажан-даа дыка ханы уткалыг чүүлдерни Дээрги Иисус дег кылдыр сеткилдиң ханызындан, бөдүүн билдингир чугаалап көрбээн.

Андрей Галилея далай чоогунга Вифсаида деп бичии хоорайга ачазы база акызы-биле кады чурттап турган. Акызының ады Симон. Олар шупту балыкчылар. Андрей акызынга Иисустуң дугайында чугаалаар дээш, далаш-биле чорупкан.

— Бис Мессия, Христосту тып алдывыс! — деп, Симонну көрүп кааш, өөрүшкүлүг дыңнаткан.

Андрей акызын Иисус-биле барып таныжып алырын сүмелээрге, ол күзелдии-биле чорупкан. Симонну көрүп кааш, Иисус аңаа:

— Сен — Симон, Иоанның оглу, ам Кифа деп адаттырар сен, ол “Даш” (Петр) дээни ол.

Дээрги Иисус бир дугаар көрген хирезинде ооң адын билир боорга, ооң элдепсинери аажок.

Иисус Симонга чаа ат тывыскаш билир: үези келирге ол бөдүүн балыкчы даш дег быжыг туруштуг, Церковь тургузукчузу, сураглыг удуртукчу болу бээр.