Ээн ховуга Иисустуң күткүткени

Бурганның база Ооң Оглунуң эң-не дерзии удурланыкчызы — четкер. Иисус Христос ооң-биле дошкун демиселче кирген. Ол демисел Иордан хемге Адазындан черге бараалгал ажылын эгелээр деп даалгазын Иисус чүгле алыры билек эгелээн. Ыдыктыг Сүлде Иисусту кургаг ховуже четкерге күткүдүп шенедири-биле аппарган.

Ээн кургаг ховуга Иисус дөртен дүн-хүн дургузунда чем-даа чивээн, суг-даа ишпээн.

Кижини бачытче ыдалап чоруур күткүкчү четкер Иисуска чоокшулап келген. Аштап, сулараан Иисус аңаа көгүттүрүптер деп бодааны ол. Ооң күзели: Ынчан ол сорулгазын чедип аар — Камгалакчы бачыт кылыптар, ынчангаш Ол кажан-даа Бодунче кижилерниң бачыдын ап шыдавас. Кижилерге мөңгеде камгалал болбас.

Ынчан четкер чугаалаан:

— Сен шынап-ла Бурганның Оглу болзуңза, бо дашты хлеб болу бээр кылдыр дужаавыт!

Иисус мынча деп харыылаан:

— Бижилгеде: Кижи амытан чүгле хлеб-биле амыдыравас, а база Бурганның аксындан үнген Сөстер-биле дириг артар — деп бижээн болгай.

Аңаа удур четкер чүнү-даа харыылап шыдаваан болгаш катап база күткүүрүн шенээр деп бодап алган. Иисусту дыка бедик дагже үндүре бергеш, делегейниң бүгү күрүнелерин, оларның күчүзүн көргүскеш, туразында улуургап чугаалаан:

— Меңээ мөгеер-ле болзуңза, бо бүгү Сээңии болур.

Иисус Аңаа мынча деп харыылаан:

— Менден ырап чор, четкер, чүге дизе Бижилгеде „Чүгле Дээрги-­Чаяакчы Бурганыңга мөгейип чор, чүгле Аңаа бараан бол“ — деп бижээн болгай».

Ооң соонда эрлик Ону Иерусалимге эдерттип эккелгеш, Бурган өргээзиниң кырынга эккелгеш, эриинге тургускаш, мынча дээн:

— Бурганның Оглу шын болзуңза, моон черже шурай бер, чүге дээрге Бижилгеде „Ол Бодунуң төлээлеринге Сени камгалаар кылдыр чагыг бээр, Олар сени, буттарың дашка илдикпезин дээш, холдары-биле көдүрүп аарлар“ деп бижээн ийик чоп.

Иисус күткүкчү-биле сөс каржып турбайн, а Ыдыктыг Бижилгениң сөстери-биле мынча деп харыылаан:

— “Дээрги-­Чаяакчы Бурганыңны шеневе“.

Иисустан сорулгазын чедип шыдавайн, четкер Ону каапкаш, чоруй барган.