Иисустуң сугга суктурганы

Захария-биле Елисаветаның оглу Иоанның төрүттүнерин база Гавриил Ангел дыңнаткан. Бурган Иоаннга онза тускай бараалгал ажылын дааскан. Ол үеде Иоанн улуг кижи апарган болгаш Иудеяның ээн ховуларынга чурттап турган.

Ээн ховуларга кым-даа шаптыктавас черге Иоанн Бурган-биле харылзажып, Ону чоок билип боданырынга ынак. Бир катап ол Бурганның үнүн дыңнаан:

— Иорданче барып, аңаа суртаалдан кыл!

Дээрги-­Бурган чүнүң дугайында суртаалдаарын база дааскан.

Иоанн далаш-биле Бурганның айыткан черинче чорупкаш, Иордан шынаазының суурларының бүгү чурттакчыларынга ол мынчаар тайылбыр кылып турган:

— Бачыдыңар минниңер! Амыдыралыңар өскертиңер! Бурганның чагыргазы черже кел чыдар! Ол ам чоокшулаан, белен туруңар! Амгы байдалга артары айыылдыг!

Ооң кыйгызын эгезинде улус чиктигзинер, а чамдыктары каттыржыр, өскелери ооң сөстеринге хорадаар болган. Ынчалза-даа оларның аразында ооң Бурган Сөзүн сурталдап турарын билип турган улус база бар.

— Сугга суктуруңар! — де, Иоанн кыйгырган. — Мен силерни Иордан суунга шымындырып тур мен. Ол демдек болур: сугга суктургаш, силер анаа чүгле хириңер чуп турар эвес, а эрги чуртталгаңар-биле чарылганыңарны херечилеп турарыңар ол. Ол силерниң чаа чуртталгаңар эгези болур ужурлуг.

Хөй кижи сугга суктуруп турган. Олар эш-өөр, таныш-­көрүжүнге чаа амыдыралды ол хүнден эгелээр күзелин илередип турганнар. А ол дыңнакчыларны сонуургадып, Иоанн-биле таныжып алыр күзелин оттуруп турган.

Чамдыктары айтырыг-даа салгылаар:

— Сен чогум кандыг эргең-биле улусту сугга суп, чуртталгазын өскертирин негеп тур сен? Медээчилерниң дыңнадып турганы Бурган Оглу эвес сен бе?

— Чок, силерниң чугаалап турарыңар Ол мен эвес-тир мен — деп, Иоанн харыылаан. — Ындыг-даа болза мээң дугайымда Исайя медээчи база чугаалаан: “Ээн кургаг ховуда алгырып турар кижиниң үнү дыңналган: Дээрги-­Чаяакчыга оруктан белеткеңер!” Мен силерни сугже суп тур мен, ынчалза-даа менден күчүлүг Кижи кел чыдар, мен Ооң идииниң шидиишкинин безин чежеринге төлеп чок мен. Ол силерни Ыдыктыг Сүлдеже база отче шымындырар.

Ол үеде Иоанн олче кел чыдар Иисусту көөрге, улус Аңаа орук чайлап, мурнунче эрттирип турган. Ынчан Иоанн бүгү чонга мынча деп чарлаан:

— Бо дээрге Бурганның Хураганы-дыр! Ол делегейниң улузунуң бачыдын Бодунче аппаар. Ол медээ ам бүдүп турар-дыр! Мээң силерге чугаалап турганым Кижи Ол-дур!

Иисус ол үеде Иоаннга чоокшулап алгаш, оожум чугаалаан:

— Мени сен сугга суксун дээш келдим.

— Сени мен сугга…? Сеңээ мен сугга суктурар ужурлуг мен!

— Иоанн, Ол ынчаар болур ужурлуг. Бурган ону күзеп турар.

Олар ийилээ сугнуң терең черинче сүзүп кире бергеннер. Иоанн өске улуска-биле дөмей, холдарын Иисустуң бажынга салгаш, Ону сугже шымындырыпкан. Ынчан кажан-даа болуп көрбээн элдеп чүве болган. Ол чүл дээрге, Иисус сугга суктуруп алгаш, сугдан үнүп кээри билек, Ооң кырынче Бурганның Сүлдези көге-буга хевиринге бадып келген, ооң соонда дээрден үн дыңналган:

— Бо дээрге Мээң ханы ынак Оглум-дур, база Мээң энерелдиг буяным!

Иоанн аңаа берген даалганы күүсеткен. Ол чонга Камгалакчы келир деп турган, а Ол ам мында — Бурганның Оглу, Назареттен Иисус! Ынчалза-даа иудейлерниң шуптузун бүзүреп алган дээри шын эвес. Чок, чүгле эвээш санныг кижи Ону Дээрги-­Чагырыкчы деп хүлээген.