Иисус өг-бүледе

Иисус Назаретке Иосифтиң өг-бүлезинге өскен. Ол он ийи харлыг апарганда Иисусту Иерусалимче Пасха байырлалынче эдертип алганнар.

Иудейлер чылдың-на Пасханы байырлап эрттирер база ону улуг өөрүшкү-биле манаарлар. Оларның чамдыктары ырак чурттарда чурттап чоруур болгаш, орукка каш-даа хонуп чорааш Иерусалимге келгеш, чыглып келген иудейлер-биле каттыжып чүдүлгезиниң чурумун сагып, байырлалга киржирлер. Олар Бодунуң чонунга ынак болгаш, үргүлчү дузалап чоруур Бурганны мактап, делгередир. Чыылган чоннуң өөрүшкүзү кыптыккан, ылаңгыя он ийи харлапкан оолдарның. Чүге дээрге оларга байырлалга киржирин бир дугаар чөпшээреп турары ол.

Бо удаада ада-иези Иисусту база бир дугаар Пасха байырлалынче эдертип алгаш, кожалары-биле кады Иерусалимче чорупканнар. Орукка чорааш Иисус чүнү көрбеди, чүнү дыңнавады дээр! Иерусалимге чедир дыка-ла хөй солун чүве көрген, а хоорай боду ооң манап турганынга деңнээр арга чок дыка-ла онза болган. Кайгамчыктыг каас-чараш храм база муң аңгы үннер чаңгыс ышкаш каттышкан! А Иисусту храмда бараалгал канчаар чоруп турары чүден артык сонуургаткан. Ада-иези Оглунга ёзулал бүрүзүнүң утказын база ону канчаар эрттирерин тайылбырлап бергеннер.

Байырлал чеди хонук уламчылаан. Чүдүүр дээш кээп чораан улус чанарынче белеткени бергеннар. Мария-биле Иосиф оглун тыппайн баргаш, кады келген кожалары-биле мурнап чорупкан деп бодааш, сагыш човавайн орукче үнүпкеннер. Кежээликтей олар Назареттен келген чаңгыс чер чурттугларының соондан чедип келгеннер. Оларның аразында Оглунуң чогун билгеш ада-иезиниң кортканын чүү дээр! Чүнү кылырыл?

Иерусалимче дедир ээр! Дилевээн чери чок, кижи бүрүзүнден он ийи харлыг оол көргенин айтырып, шаг болганнар. Ол дег оолдар көрген кижи хөй, а дилеп турган Оол ол бе азы өске бе деп кым-даа билбес болгаш ол үеде Ону кайыын дилеп болурун-даа харыылап шыдавааннар.

Иосиф база Мария улам дүвүреп, коргуп эгелээннер. Ам канчаар, адак соонда олар катап база храмның Ном-хоойлу тайылбырлакчыларының Ыдыктыг Бижилге дугайында сайгаржыр өрээлинден барып айтырар деп шиитпирлеп алганнар. Иисусту тып алыр идегел чок. Бедик эртем-­билиглиг улуг улус аразынга бичии оол турар деп бе!? Оларның чугаазының утказын Ол билир эвес, Аңаа чалгааранчыг болгай-ла. Херек кырында шупту чүве ындыг эвес: Оглу өргээде болган. Мария база Иосиф дыңнаан, көрген чүвезинге бүзүрээр харыы чок. Иисус Ном-хоойлу тайылбырлакчыларынга белен эвес айтырыгларны салырга олары арай деп харыылап, а оларның салган кандыг-даа айтырыынга Иисус угаангыр тайылбыр бээр болган. Тайылбыр бүрүзүн кайгап ханмас дыңнап, Оолдуң угаанын магадап баштарын чайгаар болганнар.

Мария база Иосиф Оглун тып алгаш, өөрээни хөлчок куспактап турганнар, а оон Мария Оглун чемелеп айтырган:

— Кайнаар чиде бердиң? Сени дилеп шаг болдувус!

— Мен кайнаар-даа барбайн маңаа турдум. Мени Дээрде Адамның бажыңында деп билбес болганыңар ол бе?

Иосиф-даа, Мария-даа Ооң чугаазының утказын билбейн барган. Олар Оглун алгаш, Назаретче чорупканнар.

Иисус өзүп, доругуп, угааны улам сайзырап турган. Ол ада, иезинге ынак, дыңнангыр, аайындан эртпес ам-даа он сес чыл кады чурттаан. Авазы Мария Иисустуң храмга чугаалаан чүвезин назынында утпайн, ол дугайын чаңгыс эвес бодангылаар турган.