Даниил Дарийниң хүрээлеңинде
Библия, Даниил медээчиниң ному, 6-гы эге
Чаа күрүнеге мидий болгаш перстерниң хааны Кир хаан апарган. Ол Вавилоннуң хаанынга мидий уктуг Дарийни олурттуп каан. Дарий күрүнени башкарары-биле чүс чээрби дүжүметти томуйлаан, а оларны удуртур кылдыр үш чагырыкчыны доктааткан. Оларның бирээзи — Даниил. Хаан Дарий Даниилди аажок үнелээр, ону бүгү күрүне чагырыкчызынче дешпидерин бодап турган. Ынчалза-даа Дарий хаанның хүрээлеңинге Даниилдиң чедиишкининге адааргаар улус база турган.
Олар кандыг бир кажар арга-биле Даниилди буруудадып, ону чок кылыр план тургузуп алганнар. Бир катап олар Хаанга келгеш:
— О хаан, узун назылаңар! Сен күчү-күштүг, ук-уксааңдан энерелдиг база өршээлдиг болгай сен. Шупту улус сээң ачы-хавыяаң-биле чурттап турар. Ол дугайын дыка хөйү билбес-тир. Ынчангаш бис сээң энерелдииңни кижи бүрүзү билзин дээш, ону канчаар кылырын бодап алдывыс. Сен чарлык үндүрер болзуңза эки деп санап тур бис. Ол чарлык ёзугаар бир ай дургузунда күрүнеде кым-даа сенден өске кандыг-даа бурганга, кандыг-даа кижиге мөгейип дилег кылбас ужурлуг. Чүнү-даа чүгле сенден дилезиннер. Ынчан сээң кайы хире хайыралыыңны көөрлер.
— Ол-даа эки бодал-дыр — деп, көгүттүрүпкен хаан чөпшээрешкен. — Чарлыкка адым салыр мен. А ону үрээн кижини арзылаңнарлыг уургайже киир октапсын.