Валтасарның найыр-дойу

Новуходоносор өлген соонде, ооң оглу Валтасар Вавилоннуң хааны апарган. Ол дойлаашкынга ынак болгаш, үезин ажыы чок байырлалдар эрттирер турган. Бир ээлчеглиг дой эрттирип турар үеде дайзыннары Вавилон хоорайны бүзээлей берген.

Ол дойга чурттуң муң дээди ызыгууртаны чыглып келген, арага-­дарының хөйү хемде аккан суг дег. Валтасар эзирий бергеш адазы Новуходоносорнуң Иерусалим хоорайда Бурган өргээзинден үптеп эккелгени алдын, мөңгүн саваларны эккээрин дужааган. Чыылган улузу ыдыктыг савалардан араганы ишпишаан, дүрзү бурганнар күжүн алдаржыдып, дайзыннардан камгалаар деп идегелин илередип турган.

Хенертен зал ишти шып-шыпшың апарган. Ханаларның бирээзинге кижи холунуң салаалары көстүп келгеш бир билдинмес чүве бижий берген. Хаан база ооң аалчылары бижип турар холду көрүп кааш, арыннары ак‑тос дег агарып, кортканындан балдыры сирилеп, дискектери бот-боттарынга шаккыладыр үскүлежип турган. Корткан хаан ханада чүнү бижээни билдинмес-даа болза, ол эки чүве эккелбес деп, эндевээн.

Хаан дыңзыг үн-биле алгырып, илби-шидичилерни, чурагачыларны база караң көрнүрлерни эккээрин дужааган. Ханада сөстерниң утказын номчуптар кижиге хаан бүгү таладан эки шаңнал аазаан. А ооң утказын билир кижи чок. Ынчан авазы оларның хаан чагыргазында Ыдыктыг Бурган Сүлдезинге бүргеткен Даниил деп кижи бар деп сүмелээн. Бодунуң хааннап турган үезинде Новуходоносор Даниилди күрүне эртемдээннериниң башкарыкчызы кылдыр томуйлаан турган.

Даниилди Валтасарга эккээрге, хаан чугаалаан:

— Сени мерген угаанныг, бедик билиглиг Бурганның Сүлдезинге бүргеткен кижи деп дыңнадым. Вавилоннуң мерген угаанныглары бо ханада сөстерниң утказын меңээ тайылбырлап чадашты. Ону шыдапсыңза сени улуг шаңнал манап турар.

Ынчалза-даа Даниил аңаа:

— Шаңнал-­белек сеңээ артсын, ат-алдарны өске кижиге беривит. А мен сеңээ ол чокка-ла номчааш тайылбырлап берейн — дээш, уламчылаан:

— Шупту хааннарны болгаш чоннарны Бурган удуртуп, холдарында тудуп турар. А сен, Валтасар, Бурган мурнунга чүрээңни томаартпайн, бодуңнуң улуг сеткилдииң база дерзии турамык чорууң-биле сен бодуң база сээң дүжүметтериң, база сээң кадайларың Бурган өргээзиниң ыдыктыг саваларындан арага ижип тургаш, алдын, мөңгүн, ыяш, даштан кылган, дыңнавас-даа, көрбес-даа дүрзүлерни алдаржыдып турган силер. А сеңээ амы-тынны хайырлаан база Бодунуң холунда сээң шупту оруктарыңны тудуп турар Бурганны алдаржытпаан сен. Ынчангаш Бургандан хол келгеш ол сөстерни бижээни ол: МЕНЕ, МЕНЕ, ТЕКЕЛ, УПАРСИН. Ол сөстерниң утказы бо-дур: “Бурган сээң хааннаар хүннериңни санааш, база төнчүзүн үндүрген; сени деңзилээрге хос-куруг ышкаш чиик болган сен. Чагырган күрүнеңерни чаргаш, мидийлер биле перстерге берипкен».

Ол-дүне Валтасар хаан өлүрткен, а Вавилонну Персияның Кир хааны эжелеп алган. Күчүлүг-­шыырак турган Вавилон хаанаашкыны ынчалдыр дүшкен.