Оттуг суугу

Үр-даа үе эртпээнде Даниилдиң Бурганы чүгле чаңгыс дириг Бурган ол-дур дээрзин Новуходоносор хаан уттуп алган. Ол чон шупту аңаа сөгүрзүн дээш, алдын дүрзү тургузар айтыышкын берген. Аңаа тураскааткан улуг байырлалче хөй аалчылар чалаан, оларның аразынга Даниилди эштери-биле база. “Хөгжүм херексели ойнап эгелээрге, улус шупту алдын дүрзүге сөгүрүп мөгеер ужурлуг, а күүсетпээн кижи кызыдыр одап каан улуг суугуже киир октадыр” деп чарлык берген.

Байырлал-даа эгелээн, хөгжүм ойнай берген! Чүгле иудей аныяктардан өске, улус шупту кээп ужуп, ол алдын дүрзүге доңгайып мөгейгеннер. Ол дугайын чалчалары хаанга дыңнатканнар. Хай-халап! Килеңнээн Новуходоносор оолдарны келдирткеш, оларның мурнунга шилилге тургускан:

— Чок болза алдын дүрзүге мөгеер силер, чок болза кызыдыр изээн суугуже киир октадыр силер! Ынчан силерни кандыг бурган мээң холумдан чайладып шыдаарыл?

А Сидрах, Мисах база Авденаго хаанга:

— Аңаа бараан болуп турар Бурганывыс бисти сээң холдарыңдан адырып база изиг суугудан камгалап алыр күштүг — дээннер. — А бир эвес Ол ону кылырын күзевес-даа болза, бис сээң бурганнарыңга бараан болуп, алдын дүрзүңге мөгейбес бис!

Ону дыңнааш Новуходоносор аажок хорадааш, аңаа харыы кылдыр суугуда оттуң изиин чеди катап улгаттыр одадыпкаш, шыырак дээн шериглеринге үш оолду чалбыыш-­оттуг суугуже октаарын дужааган. Седрах, Мисах база Адвенагону октап турган шериглер суугунуң изиг чалбыыжындан боттары безин өрттенип өлгеннер. Суугунуң чалбыыжы ол хире күштүг! А хүлүттүрген үш оол суугуже кээп дүшкеннер.

— Хаан чүү болуп турарын кичээнгейлиг хайгаарап оргаш, ында тайылбыры тывылбас элдеп чүве көргеш, аайын тыппайн барган. Ол тура халып келгеш, чөвүлекчилеринден:

— Суугуже хүлүткен үш эрлерни октаан эвес чүве бе?

— Ийе, хаан, ындыг! — деп олары харыылаан.

— А мен дөрт кижиниң от ортузунда бүдүн-­бүрүн, хостуг кылаштажып турарын көрүп тур мен! Оларның дөрткүзү Бурган Оглунга дөмей ышкаш — деп, Новуходоносор химиренген.

Ол суугуже чоокшуладыр маңнай бергеш алгырган:

— Седрах, Мисах, Авденаго, Өндүр Бурганның чалчалары! Оон үнүп келиңер!

Хаанның чөвүлекчилери чыглып келгеш, көөрге, ол үш оолдуң кайызынга-даа от дегбээн, бажының дүктери безин өрттенмээн, идик-хеви бүдүн, олардан өртеңзиг чыт безин келбес болган. Ол кижи кайгап ханмас хуулгаазын болур, чүге дээрге күштүг-­шыырак шериглер суугуга чүгле чоокшулааш безин өрттенгилей берди.

— Иудей аныяктарның мөгейип турары Бурганның шыдавас чүвези чок! — деп, Новуходоносор хаан бадыткаар ужурга таварышкан. Ол шынын чугаалаан:

— Седрах, Мисах база Адвенагонуң Бурганы алдар аттыг! Ол Бодунуң төлээзин чорудупкаш, Аңаа ынаныштыг бүзүреп чораан чалчаларын хостап алды. Олар боттарының Бурганындан өске кандыг-даа бурганнарга мөгейип, бараан болурунуң орнунга амы-тынындан-даа чарлырынга белен турдулар!

Новуходоносор ол үш аныяктарга эрге-дужаалын эгиткеш, улуг алдар-­хүндүнү көргүскен.

АЙТЫРЫГЛЫР

1) Новуходоносор хаан кандыг чарлык кылганыл?

2) Даниилдиң эштери алдындан кылган бурган дүрзүзүнге мөгееринден чүге ойталааныл?

3) Бурган оларны канчаар камгалап алганыл? Оларның камгалалын көргеш, Новуходоносор чүнү чугаалааныл?