Даниил база эштери

Новуходоносор хаанның хүрээлеңинге хаан база ноян уктуг элээн каш туттурган элээди иудей оолдар турган. Оларга хамаарыштыр хаан тускай сорулгалыг чүве-дир. Оларны үш чыл дургузунда халдей дылга база аңгы-аңгы эртемнерге өөреткеш, улуг империя удуртур дузалакчылар белеткеп алырын шиитпирлеп алган. Ол элээди оолдарның аттарын Даниил, Анания, Мисаил база Азария дээр. Оларның иудей угун кым-даа сагындырбазын дээш вавилон аттар берип каан: Валтасар, Седрах, Мисах база Авденаго.

Эжишкилер хоругдалга тургаш-даа боттарының Бурганынга бүзүреп, база аңаа сөгүрүп турганнар. Өлүмнүг айыыл турза-даа хаанның столунда чем база виноград арагазы-биле боттарын бужартатпас деп оолдар эгезинден-не шиитпирлеп алганнар.

Бурган аныяк оолдарның эрес-дидимин база шынчызын көргеш, мерген-­угаанны, билигни, өөредилгеге салымны, база ол ышкаш чараш дурт-сынны, даштыкы хевирни хайырлаан.

Даниил Бургандан онза белек — Бурганның дузазы-биле дүштер база көстүүшкүннер тайылбырлаар мергежил алган.

Бир катап ол кымның-даа баажызын тыппааны Новуходоносорнуң дүжүн тайылбырлап берген. Хаан кайгап ханмаан. Даниил ол мергежилди боду чедип албаан, а Бурган аңаа берген деп чугаалаан. Новуходоносор Даниилдиң чүдүп турары ылап-ла шын Бурганын алдаржыдып турган.