Туттуруушкун

Сайзыраңгай, бай чуртту Соломоннуң чагырып турганындан бээр үш чүс чылдар ажа берген.

Ол өлген соонда күрүне ийи кезекке чарылган. А Иерусалим биеэги хевээр кол хоорай бооп артпышаан. Ында хаанның ордузу турган, оон-даа кол чүве ында Соломоннуң тутканы Бурганның улуг өргээзи база бар. Ам ол черни Иудея деп адаар.

Харааданчыг чүве, хаан база чон Бурганның оруундан ойталааш, Ооң чагыгларын күүсетпейн, чогааткан бурганнарга болгаш кылып каан дүрзүлерге мөгеер апарган. Бурганның медээчилери оларның буруузун илередип, сойгалап, буруузун миннииринче кыйгырарга, кым-даа тооп дыңнаваан.

А ооң соонде Бурганның шииткели — чуртту Вавилон шериглери эжелепкен.

Вавилоннуң хааны Новуходоносор иудейлерниң эң айыылдыг дайзыны турган. Ол Иерусалимни аг-шерии-биле келгеш эжелеп алгаш, ооң хаанын тудуп хоругдааш, Бурган өргээзинден алдын, мөңгүн саваларны дөгере үндүрүп алгаш, Вавилоннуң меге дүрзү бурганнарлыг хүрээзинче көжүрүп аппарган. Вавилончулар Бурганның өргээзинден база Соломоннуң бодунуң ордузундан бар-ла эртине-­байлакты база үптеп аппарганнар. Апкы дег чүвени дөгере үптеп алгаш, ыдыктыг өргээни база хаанның ордузун, база бай иудейлерниң бажыңнарын шуптузун өртедипкеннер.

Новуходоносор иудей аныяк оолдарны, база хаанның оолдарын, база Иудеяның баштыңнарын, чеди муң ажыг шыырак дээн шериглерин, шевер тудугжуларын болгаш дарганнарын кул кылдыр Вавилонче тудуп апарган.

Ынчалдыр Иудея база Иерусалим Новуходоносорнуң чагыргазының адаанче кирген.

Дээрги-­Чаяакчы шак ынчаар Бодунуң чагырга чок бачыттыг чонунга шииткелди кылган. Өске чурттуң кулдары апаргаш, израиль чону оларның Дээрги-­Чаяакчызы ёзулуг Бурган ол-дур, а дүрзүлер — меге бурганнар-дыр деп чүвени медереп билир ужурлуг.