Ниневия чону бачыдын билинген

Каш неделя эрткенде Иона улуг кудумчуларны кезип, Бурганның аңаа чугаалаан чүвезин чонга суртаалдап турган:

— Дөртен хонук эртерге Ниневия бустур-дур.

Элдеп чүве, кым-даа ону кочулаваан. Кым-даа олче халдаваан база кыжанмаан. А харын-даа ооң сөзүнге бүзүреп турганнар. Оларның дыңнааны кеземче чөптүг, шынныг, чүге дизе олар хөй чоннарже халдап дайылдажып, эвээш эвес каржы-­дерзии чүвени кылганнар. Ындыг каржы дерзии чорук кеземче чок артпас дээрзин база билип турганнар.

Хаан база ол медээчи дугайында, ооң шииткел дугайында суртаалын дыңнааш, дужаал берген:

— Чон шупту Бурганга сөгүрүп тейлезин. Канчап билир, дыңнап кааш Ол бисти кээргеп өршээр чадавас. Шуптуңар шээрленип, билингениниң демдээ кылдыр каас-коя хеп кетпейн, качыгдал хевинден (кадыг шоодай дег) кедип алзын.

Дөртен хонук эрте бээрге, Иона хоорай артында тейлерниң бирээзинче үне бергеш Ниневияның буступ дужерин манап олурган. Чүү-даа болбаан. Хүн ажып бар чыткан, а Ниневия турбушаан хевээр. Иона хорадай берген. Бурганның шииткели келир деп, ол чүге чугаалааныл ынчаш? Ниневияның каржы чурттакчылары узуткаттырган турган болза чөптүг ийик.

Ионаның олурган тейиниң кырынга хүннүң изиинге Иона улам шыжыгып турган. А эртенинде оттуп келгеш, ол чоогунда улуг үнүш үнүп келгенин көрүп каан. Ооң бүрүлериниң хөлегезинге Иона оожургай берген.

Ол үнүштүң бо изигде ындыг дүрген өзүп кээрин Бурган болдурган. А эртенинде Бурган үнүштүң кургап каарын база болдурган. А Иона ол дээш муңгараанындан өлүрүнге безин белен.

Ынчан Бурган Ионага чугаалаан:

— Көрүп тур сен бе, өстүрбээниң, ажаап күш үндүрбээниң ол үнүш дээш аажок хомудадың. Ынча хөй чон чурттап турар Ниневияны Мен канчап хараадавас мен.

Ынчан Иона Бурганның үр шыдамыын, база өршээринге күзелдиин билген.