Шеваның кадыны

Соломоннуң алдарының база кайгамчык улуг тудугларының сураа черниң ырак булуңнарынче тарай берген. Кайгамчык чараш өргээни көөр, база Соломоннуң угаангырын дыңнаар дээн улус Израильче кайын-даа кээп турган. Оларның бирээзи — Шеваның кадыны.

Кадын боду база дыка бай. Соломонга эккелген ооң белектеринден көскү. Алдын болгаш, үнелиг даштарны, чаагай чыттыг улуг өртектиг чүүлдерни тевелерге чүдүрүп келген. Хөй санныг кулдар орукка ол байлактарны камгалап чорааннар.

Сураглыг аалчыны хаан ёзузу-биле Соломон боду уткуп, хүлээп алган. Шеваның кадыны аңгы-аңгы айтырыгларны салып, Соломон-биле чүрээнде бар-ла бүгү чүве дугайында бирден-­бирээ чокка хөөрешкеннер.

Кадынның айтырыгларының шуптузунга Соломон харыыны берген, а ооң билбези база харыылап шыдавайн барган айтырыг артпаан.

Шеваның кадыны Соломоннуң мерген-­угаанныын бүзүреп көргеш, ооң тудуп алган бажың-­балгадын, ажын-чемин база кулдарының чурттап турар байдалын, чалчаларының идик-хевин, база Бурганга эккеп турар өргүлүн көргеш кайгап-­харап, магадаанын чажырбаан.

Кадын кайгап чугаалаан:

— Сээң мерген-­угааның болгаш бай-шыырааңны дыңнаан мен, а меңээ чартыын безин чедир чугаалаваанын бодум бүзүреп көрдүм! Сээң мерген-­угааның база ажыл-херээң мээң дыңнаанымдан каш катап ажыг-дыр! Сени деткип, хаанга томуйлаан Дээрги-­Бурганга алдар! Бурган ону Израильге мөңге ынакшылы-биле кылган-дыр!