Бурганга өргээ тудуу

Дээрги Бурган Соломоннуң чагыргазын алгап-­йөрээген. Чурт иштинге сайзырал болгаш эп-найыралдыг тайбың доктааган. Ынчалза-даа Соломоннуң мурнунда улуг сорулга — Бурганга улуг өргээ тудары.

Египеттен үнгенден бээр дөрт чүс сезен чылдар эрткенде израильчилер Бурганга улуг өргээни тудуп эгелээннер. Соломон адазы Давидтиң эжи Тир база Сидоннуң хааны Хирам-биле тайбың-­эвилелдиң керээзин чарып алган. Ол керээ ёзугаар Хирам тудугну үнелиг ыяш болгаш даштар-биле хандырар, а орнунга Израиль аъш-чем-биле оларны хандырар ужурлуг. Өргээ тудуу чеди чыл болган. Тудугнуң планын Соломонга Давид өлүр мурнунда берген чүве-дир. Ону тудар черин база Давид айтып берген — Мориа даанга. Ол дагга шаанда оларның өгбези Авраам Бурганга бердингенин шынзыткан, а Бурган Исаактың амы-тынын камгалаан турган.

Ук өргээ ийи кол кезектен тургустунган: “Ыдыктыг” болгаш “Ыдыктыгның Ыдыктыы”. Ыдыктыгның Ыдыктыында өске өрээлдерден бедик черде Чагыг-керээ аптаразы (ковчег Завета) бар, ол ийи өрээлдиң аразын кылын көжеге-биле аңгылап каан.

“Ыдыктыгның Ыдыктыы” соңга чок, караңгы турар ужурлуг. Библия ону “Бурган-биле чугаалажыр чер” деп турар, чүге дээрге Бурган көзүлбес-даа болза ында бар.

Өргээниң тудуун дооскаш, ону өөрүшкү-­байырлыг ыдыктааннар. Соломон шупту баштыңнарны база израиль аймактарының удуртукчуларын чыггаш, Чагыг-керээ аптаразын көдүрүп, Ыдыктыгның Ыдыктыы өрээлге эккеп тургусканнар. Ыдыктыг аптараны Бурганның бараалгакчылары Ыдыктыгның Ыдыктыынче киирип салыптарга, булут бадып келгеш өргээни дола берген.

Кылган чүүлдү деткээнин болгаш Израиль чоннуң аразында болуп турарын Бурган ындыг демдек-биле көргүскен.

Өргээ тудуунга ооң кылган шупту ажылын Бурганның хүлээп алганынга Соломон ыяк бүзүрелдиг.