Сион даанда ковчег

Бурганның аазааны-биле Давид хааннай берген. Ол Вифлеемге төрүттүнген, аңаа хой кадарып өскен, а хаан апаргаш Иерусалимге чурттап турган.

Иерусалим — онза ылгалдыг чараш хоорай. Ол бедик тейлер аразында. Оларның бирээзин Сион даа дээр. Ол дагга Давид бодунга орду тудуп алган. Ооң Бурганга ынаа дендии, ынчангаш ковчег ооң чанынга турарын күзээр. Ол ковчегти эккээр деп шиитпирлээн.

Давид Бурганның хөй бараалгакчылары-биле кады чорупкан… Чон база янзы-бүрү арфа, труба, флейта, цимбал, псалтирь хөгжүм херекселдеринге ойнап, хаанны үдеп чорааннар. Ыр-шоорун Бурганга тураскаадып, алдаржыдып турганнар. Ырлашкан, аялгалаан улус-биле кады Давид арфага ойнап чораан. Оларның соондан бараалгакчылар ковчегти көдүрүп алгаш эккел чоруур.

О, Бурганны мактаан ыр-шоор дыңнап, ону көөрүнүң өөрүнчүүн чүге деңнээр! Ол байыр-­чыскаалга уткуй хөй чон орукче үнүп турган. Давидтиң Бурганга тураскаадып ырлап, арфага ойнап чораанын олар магадап дыңнааннар. Давидтиң ол хүн аас-кежиктиин!

Ковчегти Сион дааның кырынче көдүрүп үндүре берген. Ол долгандыр улуг хаалгалыг бедик ханаларлыг. Байырлап чыскаалдаан чон чоокшулап кээрге, ковчегти база хаанны киирип алыр дээш, хаалганы ажыдыпкан. Ковчегти тургузар черни белеткеп каарын Давид баш удур сагындырып каан турган, ам көжегелеп каан ковчегти ында тургузуп алганнар. Ыраажылар Давидтиң чогаатканы “Дээрги Бурганны алдаржыдыңар!” деп ырны ырлажып турган. Ол хүн Давид хаан Бурганга өргүл салгаш, Израиль чонун база алгап-­йөрээген.

Бурганның ковчеги Давидтиң ордузунуң чанында болганынга, Давидтиң өөрүп турары аажок. Хүннүң-не ыраажылар ковчег баарынга хөгжүмге ойнап, байырлыг гимнерни ырлажып турар.

Давид хаан ордузунга үргүлчү турбас, филистимнер болгаш Изрильдиң өске-даа дайзыннары-биле демисежир дээш чоруптар. Бурган тиилээр арганы аңаа база ооң шериинге берген санында-ла Давид Сион даанче ээп кээп, Дээрги Бурганга четтиргенин илередип, Ону алдаржыдып турган.