Давид база Саул

Ол тиилелге соонда Давид хаан-биле артып калган. Саул бодунуң столунга ооң-биле чемненип, хөөрежип, а чамдыкта арга-сүме-даа айтыргылаар. Давид чоорту ок-чепсек тудуп өөренип, арга мергежилдиг, аваангыр дайынчы болган. Аныяк кижиниң чугаалаан, кылган чүве бүрүзүн хаан база хаан хүрээлеңиниң улузу аажок чүүлзүнер турган болгаш, ол хаан аг-шерииниң баштыңынга депшиткен. А Давид Саулдуң оглу Ионафан-биле найыралын ол эргезинден артык үнелээр. Олар чоок эжишкилер апарганнар.

– Мээң дериг-херекселимни, мээң селемем, ча-согунум ап ал – деп, филистимни тиилээн соонда Ионафан Давидке чугаалаан. – Олар бистиң найыралдашканывыстың демдээ болзун.

– Ол хүнден эгелеп Давид-биле Ионафан бот-боттарынга шынчы, бердинген, чоок эжишкилер болуп, найыралын аажок үнелээр апарганнар.

Давидке чон база ынак апарган. Кудумчуга чоруурга эр, херээжен-даа, бичиилер-даа ону көргеш Саулду көргенинден артык өөрүүрлер. Ону көргеш Саул Давидке ажынар база хүннээр апарган.

– Бир катап Саул Давид-биле стол артынга олурганнар. Хенертен Саулдуң каржы дерзии килеңнээр чаңы кирип келген. Давид ону оожуктурар дээш, дыка дүрген хөгжүмге ойнай бээрге, бо удаада аялга дузалаваан. Саулдуң килеңиниң чылдагааны Давид-ле болгай. Аңаа дужааштыр олурган гуслиде ойнаан аныяк оолду көргеш, ол бодун туттунуп чадашкан. Ханада чөлендир тургузуп каан копьёзун хаан сегирип алгаш, бар-ла күжү-биле Давидче шывадапкан. А Давид кичээнгейлиг олурган болгаш дыка дүрген доңгайыптарга, копьё ооң бажының кыры-биле сыыладыр эрте берген. Улам хорадаан Саул база бир копьё сегирип алгаш шывадапкан. Бир эвес Давид кызаңнаашкын дүргени дег чайлай бербээн болза, ол удаада копьё ону өттүр дээр турган чадавас.

– Моон соңгаар Давидти көөрүн күзевейн-тур мен! – деп, хаан кышкырган. – Та каяа филистимнери-биле дайылдашсын, чүгле моон ырап чорзун!

Дээрги Бурганның Давид-биле кады болуп турарын көргеш, Саул корга бергеш, Давидти бодундан ойладыпкан.

Голиаф-биле демисежириниң мурнуу чарыында аазаан сөзүн Саул күүсеткен деп демдеглезе чугула. Ооң уруу Мелхола Давидке кадай болган.

Ынчалза-даа Давид дөмей-ле дезер ужурдан чайлаваан, чүге дизе Саулдуң Давидти чүгле шөлүп чорудар эвес, а өлүрер деп турарын дыңнааш, Ионафан Давидке дыңаткан.