Элээди кадарчы

Ол шагда Вифлеем ийи-чаңгыс чорумалдар киргилээр бичии сууржугаш турган. А Бурган Самуилди ол суурда чурттап турар өг-бүлеже чорудупкан. Ол өг-бүлениң бир оглу сөөлүнде барып Израильге хаан болур, чонну чагырар ужурлуг. Самуил медээчиниң келгенин өгнүң ээзи Иессей улуг хүндү деп санап, оларның-биле чемнениринче чалаан.

Столга чемни делгепкенде Иессей оолдарын таныштырган:

— Улуг оглум бо-дур — деп Иессей чоргаарланган.

“Ол ам безин хаан ышкаш көстүр-дүр — деп Самуил боданган. — Саулдуң хаанга томуйладып турган үези дег бедик, чараш дурт сынныг! “

Ол үеде Самуилге Бурганның үнү дыңналган:

— Ооң бедик-­чаагай даштыкы хевиринче көрбе! Кижи даштыкы хевиринден шилиир, а Бурган кижи дег эвес, чүрээнче көөр. Бо оол хаан болбас ужурлуг.

Ынчалдыр Иессей оолдарын дөгерезин чаңгыстап таныштырарга, Бурган оларны: “Чок, ол эвес!” — дээр болган.

— Ам столга олуруп чемнениңер — деп, Иессей Самуилди чалаан.

— Адыр, сээң оолдарың шупту мында бе?

— Хеймер оглум бар. Ол ам шынаада хой кадарып турар.

— Ол база маңаа келзин!

Удаваанда Давид Самуилге чедип келген. Ол ак-сарыг баштыг, чараш карактарлыг, чазык арынныг элээди оол болган.

— Ол-дур! Ону томуйлап кал! — деп Дээрги-­Бурган Самуилге дааскан.

Самуил олива үстүг мыйысты алгаш, элээди оолдуң хаваан чаап, чугаалаан:

— Бурганның ады-биле сени Израиль чонунуң хаанынга томуйлап тур мен. Дээргивис сени алгап йөрээзин!

Ол үеде Ыдыктыг Сүлдези-биле Бурган Давидти бүргедипкен.

Иессей база ооң оолдары кайгап-­ханмайн сөс чугаалаар харыы чок аңгадап, кайгааннар, а Давид ооң-биле чүү болуп турарын ол хүн орта-даа билбээн.