Израиль чону хаан негээн

Самуил ам кыраан. Ону таварыштыр Бурган дыка хөй чылдарда Израиль чонун удуртуп келген. Ол маргышкак айтырыгларны шиитпирлээр судья, база чонну Бурганга дыңнангыр болурунче кыйгырар медээчи. Ындыг-даа болза израильчилер өске чоннар дег, бисти база хаан чагырзын деп негелде кылганнар.

Ол негелдези-биле Самуилге келгеннер:

— Бисти чагырар хаандан томуйлап калыңар!

А Самуил аңаа таарзынмаан. Ол Бурганга мөгейип, тейлээрге, а Бурган ону дыңнааш, харыылаан:

— Чон сеңээ чүү дээрил, оларны дыңна. Олар сенден эвес, а оларны чагырбазын дээш, Менден ойталап турар-дыр.

Ынчан Самуил хаан дилеп турган чонга чугаалаан:

— Бурган силерге хаанны бээр. А хаанның мурнунга хүлээлгеңер мындыг болур: силерниң оолдарыңар аңаа чалчалар болур: чамдыызы ооң шериг хүлээлгезин күүседир, бир чамдыктарын хаанның чуузазын үдеп чоруур чалчалар кылып алыр. Олар ок-чепсек дарганнап, дайынчы тергелер база хаанның чуузазын, дериг херекселин кылыр чалчалар болур; чамдыктары хаанның шөлдерин болбаазырадыр, тараазын ажаар.

— Кыстарыңарны күш-биле алгаш баар, олар хаанның аъш-чемин кылыр, далганын быжырар, силерниң шөлдериңерни база эң-не эки виноградтыг садтарыңарны алгаш, бодунуң дүжүметтеринге бериптер. Дүжүдүңер онгу кезээн алгаш, бодунуң улузунга үлеп бээр.

Эки мөзүлүг кулдарыңар база ооң ажылын кылыр. Ол үеде силер хаан күзээниңерге хомудап, ыглажыр силер. А ынчан Дээрги-­Чаяакчы силерге харыылавас.

А Самуилдиң чугаалаан сөстерин чон тооп көрбээн.

— Биске хаан херек! — деп негевишаан.

Ынчан Бурган оларга Саулду хаан кылдыр томуйлап каарын айыткан. Саул аныяк, чараш дурт-сынныг, оларның шуптузундан бедик, көрүштүг чүве-дир. Израильчилер ону өөрүшкүлүг уткуп алгыржып турганнар:

— Хаан делгерезин!

А Саул Бурганның чагыын күүсетпейн, бодунуң туразы-биле аажылап турган болгаш эки хаан болбаан. Ынчангаш Бурган Саулдуң үре-салгалы

Израильдиң хааннары болурунга хомудай берген.

— Бурган Саул Израильдиң хааны болуп турган үезинде-ле бир аныяк оолду Саул өлген соонда чуртту чагырар кылдыр томуйлаан.