Каин база Авель

Адам-биле Ева Эдемден үндүр шөлүттүрүпкен соонда сесерликтен дашкаар чурттай бергеннер. Олар Каин, Авель деп ийи оолдуг болган. Олар база Адам ышкаш, аар ажыл кылыр ужурлуглар. Каин чер ажылдыг, а Авель хой кадарчызы.

Бурган Эдемге кээп турганы ышкаш ам кээри ховар, кижиге чүгле кезек-­кезек болгаш кээп, Оон дилег кылырын чөпшээреп турган.

Каин база Авель бир катап Бурганга өргүл кылырын шиитпирлеп алганнар. Каин черден өстүрүп алган дүжүдүнден өргүл кылган. Авель эң эки хураганын өргүл одаанга эккеп салган. Дээрги Бурган Авельдиң эккелген сөңүн хүлээп алгаш, а Каинниң сөңүн хүлээвээн. Бурганга кол чүве сээң кандыг чүректиг Аңаа келгениң. Каинниң чүрээнде топтуг чурум чок болган. Каинниң хөңнү баксырап, арнын-­шырайы безин хөлүе берген. Ооң дуңмазынга адааргааны ол.

Бурган Каинниң чүрээн көргеш, боданып, оожургап алыр аргазын берген. Бурган Каинден айтырган: “Чүү болду? Чүге ажына бердиң? Чүрээң айыылдыг байдалда турарын боданып көр. Каржы-халап сенче халдап турардыр, а сен ону киирбе”. Каин дыңнангыр болбаан. Ол Бурганга Авель дег ынак эвес, а чүгле бодунга ынак.

Ол Авельди бодап келген санында-ла көөр хөңнү чогу күштелип турган. Ынчалдыр коргунчуг байдал тургустунган. Бир катап олар ийилээ хову шөлүнге чораан үезинде.

Каин дуңмазын өлүрүп алган. Авельдиң төгүлген ханындан черниң довураа хүрең-кыза берген. Черге өлген бир дугаар кижи — Авель. Ынчалдыр Каинниң көөр хөңнү чок чоруу дуңмазын өлүреринге чедирген.

Удавайн Каин Бурганның аңаа сөстерин дыңнап каан:

— Дуңмаң Авель кайыл?

— Билбес мен. Дуңмамны мен кадарып турар эвес мен.

Бурган аңаа:

— Мен дуңмаңның черже төгүлген ханын көрдүм. Ол дээш сени кезедир мен, чүге дээрге бачыттың сени эжелээр аргазын берген сен. Бажың-балгадың каггаш, хары черге кезээде чер кезип тояар, база каяа-даа дыш тыппас сен.

Каин Бурган-биле чугаалашкан черинден ырап чорупкан.

Адам, Ева ынчалдыр ийи оглун оскунганнар, чүге дизе Каин оларны каапкан, а Авель өлген. Оларның Авельдиң өлгенинге кайы хире качыгдап турганын чүге деңнээр!

А Каинниң бачыт-­каржызын бодааш, оон-даа артык ыглап турганнар база чадавас. Чүге-ле олар четкерниң аайынга кирип, хоруглуг чимисти чип алганнары ол ирги?

Ынчанмаан турган болза олар кажан-даа Бурган-биле харылзаазын база Эдемге турганы дег аас-кежиин чидирбес турган ийик. Каин каржы бачыт үүлгетпээн, а Авель дириг турбас бе.

Каин сөөлүнде кадайланып алган, төрүттүнген ажы-төлү база ол дег, каржы чүректерлиг, Бурганга ынак эвес, Ону дыңнаар хөңнү чок болган. Ынчалза-даа Бурган Адамны кээргээш, база бир оол берген. Ол Бурганга аажок шынчы, ынак, ады — Сиф. Адам-биле Евага ол дыка чугула, чүге дээрге Каинден Камгалакчы төрүттүнмес деп чүвени олар билип турган. Сифтиң ажы-төлү база Бурганга аажок ынактар.

Черге ынчалдыр ийи аңгы аймактар чурттай берген: Каинниң ажы- төлү база Сифтиң ажы-төлү. Библияда Сифтиң салгалын Бурганның ажы-төлү, а Каинниң салгалдарын кижи ажы-төлү деп адаан.