Иордан хемни кешкени

Эртен эрте Иисус бүгү израильчилер-биле кады Иорданга чедип келген. Хем эриинге доктаап турумчуп алгаш, олар хемни кежеринге белеткенип турган. Иисус чонга: «Ыдыктанып-­арыгланып алыңар, чүге дээрге даарта Дээрги-­Чаяакчы силерниң араңарга кайгамчык чүүлдер кылыр деп турар” — деп айыткан.

Эртенинде Бурган Иисуска:

— Бөгүн Мен бүгү Израиль чонунга Моисейге дузалап чорааным дег, сеңээ база дузамны көргүзер мен. Бараалгакчыларга чугаала: ыдыктыг ковчегти көдүргеш, Иордан суунга кирген дораан доктаап турупсуннар! — дээн.

Ынчан Иисус Бурганның бараалгакчыларынга ковчегти көдүруп алгаш, ооң биле кады чоннуң мурнундан чоруптарын дүжаагаш, а чонга айтыышкын берген:

— Бөгүн Дээрги Бурганның кылган кайгамчыктыг хуулгаазынын көөр силер — араңарда Бурган бар, Ол дириг! Дугуржулга ковчеги силерниң мурнуңардан кежер. Аймак бүрүзүнден бир кижиден шилип алыңар. Ол тускай даалга алыр. Ковчегти көдүрүп чоруур бараалгакчыларның буттары сугну сүзүп кирери билек, Иорданның суу агымын соксадыптар, хемниң бажындан агып келген суг бедик хана дег туруптар, а өске талазындан суг кургап, калбак орук тыптып кээрге, бараалгакчылар ковчегти хемниң ортузунче көдүре берген. Олар аңаа доктаап туруп алганнар. Израиль чону шупту ковчегтиң чаны-биле Иордан хемниң өске эриинче кеже берген.

Он ийи салгалдан бир-бир төлээ бараалгакчыларның турган чериниң хем дүвүнден бир, бир даш уштуп алгаш, чоннуң хонар дээш доктааган черинге эккелзин деп Бурган айтыышкын берген. Нуннуң оглу Иисус боду база тураскаал кылдыр он ийи даштан бараалгакчыларның турган черинге Иордан дүвүнге чыып салып каан.

Чон шупту Иорданның өске эриинче кежип кээрге, оларның соондан ыдыктыг ковчег көдүрген бараалгыкчылар база үнүп келгеннер. Олар чүгле хемни кежип кээри билек, Иорданның суу кургаг черни долдуруп эрги хевээр ага берген. Бурганның кылганы ол кайгамчыктыг болуушкунну көрген чон силгидипкен ышкаш, кайгап ханмаан, Иерихоннуң Чөөн талазынче Галгаалга доктаап, турлагжып алганнар.

Нуннуң оглу Иисус он ийи төлээлерниң хем дүвүнден уштуп эккелген демги даштарын ол черге чыып салгаш, чонга чагаан:

— Ада-өгбелериңер оолдары: “Ол чүү даштарыл?! — деп айтырза, “Бурганның ыдыктыг ковчегиниң баарынга Иордан суу доктаап үстү берген” — деп чугаалаар силер. Чер делегейниң бүгү чоннары Дээрги-­Чаяакчының холунуң кайы хире күштүүн билзин дээш, Израильге тураскаал-дыр. Ол ышкаш силерниң Бурганыңар Дээрги-­Чаяакчы кажан кезээде Оон коргуп, дириг артарыңарны күзеп турар!