Раав база хайгааракчылар

Моисей өлген соонда Нуннуң оглу Иисус Израиль чонун даңгыраглаан черни эжелеп алырынга белеткей берген. Бир эвес ол Бурганның бергени хоойлу-­чагыгны күүседип, Аңаа дыңнангыр болур болза, аңаа дузалаарын Бурган аазаан.

— Эрес-дидим, туруштуг бол — деп, чагаан. — Кайнаар-даа баарыңда сээң Бурганың — Дээрги-­Чаяакчы сээң-биле кады болур!

Иисус чонга үш хүннүң хүнезинин белеткеп алыр айтыышкын берген, чүге дизе олар ам Иордан хемни кежер. Ол Ханаан черин Бурган оларга аазаан, ынчангаш ону даңгыраг чери дээр.

Иисус дыка оваарымчалыг. Ол Иерихон хоорайның байдалын өөренип эккээр ийи хайгааракчы чоруткан. Аныяк хайгааракчылар хоорайны өөренип чоруп тургаш, орайтай бээрге, Раав деп аттыг херээженниң бажыңынга хонуп аар бодааннар. Ооң бажыңы хоорай ханазында чүве-дир.

Иерихоннуң хааны чалчаларындан ону дыңнааш, израильчилерни тудуп-­хоругдаарын дужааган. А Раав оларны бажыңының крыша адаанга чажырыпкаш, хаан чалчаларын мегелепкен:

— Ийе харын, танывазым улус келди. Караңгылай бээрге чоруй бардылар, а кайнаар чорупканын билбедим. Соондан дүрген маңнажыңар.

Хаанның чоруткан улузу израильчилерни сүрүп маңнажыптарга, Раав бажың кырында улузунга барып чугаалаан.

— Дээрги-­Чаяакчы бистиң чурттувусту силерге берипкен деп билир мен. Иерихоннуң чурттакчылары бис шупту силерден коргуп турар бис. Силер Египеттен чоруп туруңарда, Дээрги-­Чаяакчы силерниң орууңарга турган Кызыл далайны кургадыпкан деп дыңнадывыс. Чүге дээрге силерниң Бурганыңар Дээрги-­Чаяакчы өрү дээрде-даа, куду черде-даа тергиидеп турар-дыр! Мээң силерге энерел көргүскеним дег, мээң өг-бүле шуптувусту өлүмден чайладырын даңгыраглап, бадыткал демдээн меңээ арттырып бериңер!

Хайгыылчылар Раавтың база ооң улузунуң амы-тынын камгалаарын даңгыраглап аазааннар. Ооң соонда Раав оларны соңгадан чоон хендир-биле черже бадырыпкан. Кандыг таварылгада оларның берген даңгыраа күштүг болурун хайгыылчылар Раав-биле дугуржуп алганнар: кажан бис бо чуртка чедип кээривиске, сен кызыл хендирни бисти үндүрүпкениң соңгаңга баглап аар сен. Ол сээң база шупту төрелдериңниң камгалалынга тускай демдек болур” — деп чагааш, олар хоорайдан чорупкан.

Менди-чаагай ээп келгеш, Иисуска хоорай дугайында база оларның-биле чүү болганын илеткеп түңнээннер:

— Дээрги-­Чаяакчы бо бүгү чуртту биске берипкен, а ооң чурттакчылары бистен аажок коргуп-­сүртеп турар-дыр» — деп, олар Иисуска чугаалааннар.