Иерихонну чаалап алганы

Иерихоннуң чурттакчылары израильчилерден корткаш хоорай хаалгазын хаггаш, быжыглап алганнар.

Ынчан Дээрги-­Чагырыкчы Иисуска:

— Иерихон хоорайны база ооң хаанын аг-шерии-биле кады сээң холуңга хүлээдип тур мен. Бүгү шерииңер Иерихонну долгандыр алды хүн дургузунда хүнде-ле бир катап хоорайны долганып турзун. Ол ышкаш ыдыктыг ковчегтиң мурнундан мыйыс эдискилер туткан чеди бараалгакчы кылашташсын. А чедиги хүнде хоорайны чеди катап долгандыр кылаштаңар, а бараалгакчылар эдискилерни үрүп чорзуннар. Кажан мыйыс эдискилерни үрүп эгелээрге, бүгү чон ону дыңнап кааш, кончуг ыыткыр кылдыр алгырышсын. Ынчан хоорайның ханазы бусту бээр, силер хоорайже турган чериңерден-не кире бээр силер» — деп чугаалаан.

Нуннуң оглу Иисус Бурганның ол айтыышкынын бараалгакчыларга база шериглерге дамчыткаш, алдын, мөңгүн база чес, демирден кылган эт бүрүзүн Бурганга тураскаадыр деп немей чугаалаан. Иисус чонга боттарынга херек чүнү-даа албазын сагындырган, чүге дизе ол дээш кеземче — өлүм.

Израиль чон Бурганның чагыын сөглээн ёзугаар күүсеткен.

Израильдиң шерии үнүпкен. Оларның мурнундан эдискилерлиг чеди бараалгакчы, оларның соондан чагыг-­керээ ковчеги көдүрген бараалгакчылар, оларның соондан трубалар эдискен израильчилер. Оон Иисустан тускай айтыышкын албаан шаанда чүнү-даа ыытташпазын база сагындырган.

Израильчилер алды хүн хоорайны долганган. Чедиги хүнде эртен эртелеп Иерихонну ыыт чок долганып эгелээннер, чүгле бараалгакчылар трубаларын этсир болган. Хоорайны чеди дугаар долганганда бараалгакчылар трубаларын этсиптерге-ле Иисус дужааган:

— Хөлчок ыыткыр алгырыптыңар!

Шериглер шупту деңге ыыткыр алгыржыпкан. Ынчан хоорайның ханалары сирилеп, улуг даштар оон хоорлуп эгелээрге, быжыг хана шимээн-­дааштыг буступ дүшкен. Чүгле Раавтың бажыңы турган кезээ бүдүн туруп калган.

Израильдиң шериглери ол-ла дораан хоорайны дыка дүрген эжелеп алганнар.

Нуннуң Оглу Иисус хоорайны хайгаарап чораан улузунга Раавты төрелдери-биле кады бажыңындан үндүрүп, аазаан аксын күүседирин айыткан. Аныяк хаайгыылчылар оларны тып алгаш, израильчилерниң Галгалда турлаанга чедирип кааннар. А Иерихондан чүү-даа артпаан.