Чес чылан

Израиль чону кургаг ховуларга хөй чылдар дургузунда көжүп келген. Чамдыкта олар Ханаанга чоокшулап келгилээр, ынчалза-даа адагаш булут катап-ла ээн ховуларже оларны эдерти бээр болган. Дыка хомудаарлар, чүге дизе даңгыраглаан черже оларның кириксээри хөлчок. Еврейлер кургаг ховуларга хыйланып, могаттынып турбаан болза, Дээрги Бурган шагда-ла Ханаанче киире берген турбас бе, ынчалза-даа оларның кылган бачыды дээш алган кеземчези киирбейн турганы ол.

Бир катап олар катап база Бурганга база Моисейге удурланы берген.

— Чүге бисти Египеттен үндүрүп келдиңер? Кургаг ховуларга ам аштап өлүрүвүс ол-дур, мында хлеб, суг безин чок, а чаңгыс манна боостаада чыдыпты.

Ол дээш Бурган шыңгыы шииткел чоруткан: кайын ийик шагар чыланнар тыптып келгеш, оларны шап эгелээн. А ол чыланнарга шактырган кижи шупту өлүп эгелээн.

Израиль чону боттарының шын эвес болганын миннип, Моисейге келгеш чугаалаан:

— Бурганга удур база сеңээ удур бачыт кылдывыс. Бурганга чалбарып, бисти чыланнардан камгалаарын дилеп көр.

Моисей тейлээрге Бурган дыңнааш, айтыышкын берген:

— Честен эзилдиргеш, чыландан кылып ал. Ону узун ыяшка бедидир азып алгаш, чонга чугаала, чес чыланче көрүпсүннер. Ынчан олар дириг арттарлар.

Хову турлааның кайы-даа талазындан бедик азып каан чес чылан көстүп турар болгаш, чыланга шактырган кижи олче көрүптер аргалыг. Көрүптери-ле четчир, кижи күш кирип, кадык апаар.

Бурганга бүзүрээш, чес чыланче көрүпкен израильчи кижи бүрүзү экирип, Бурганны алдаржыдып турган. Ынчалза-даа аразында чес чыланче чүгле көрүптерге-ле экирииринге четчир деп чүвеге бүзүревейн барган кижилер база бар. Ол хомуданчыг! Бүзүревээн база чыланче көрүнмейн баргаш өлгеннер база бар. Амы-тынны чес чылан эвес, а Бурган берип турган! Кижиден чүгле Бурганга бүзүрээри болгаш Ооң берген камгалал аргазын хүлээп алыры негеттинер.