Хаядан суг

Израиль чону бир черден өске черже көжүп, ээн куруг ховуларга дыка үр чурттаан. Бир катап олар суг чок черге көжүп келгеннер. Олар чүнү канчалганнарыл? Дилег-биле Бурганга келгеннер бе азы хыйланып, химиренип эгелээн бе? Эргиде турганы дег, берге байдал таваржырга-ла химиренир чаңы хевээр, Моисей-биле Ааронга удур хорадап эгелээннер.

— Чүге-ле черле шагда-ла өлү бербээн бис? Чүге бисти Египеттен үндүрүп келген сен, кургаг ховуга өлзүн дээш бе? Мында смоковница-даа, виноград-даа, кандыг-даа чимистиг ыяш чок, ам суг безин чок-тур!

Бурганга шак-ла ындыг бүзүрел чогу дээш, кургаг ховуларда хевээр чоруурун уттуп алганнары ол.

Оларның ол хыйланырын дыңнааш Моисей биле Аарон аажок-ла хомудааннар. Олар чондан аңгыланып, Бурганга ыдыктаан майгынының баарынга черге доңгайып, Бурганга чалбарып эгелээннер. Удаваанда Бурган оларны дыңнааш, Моисейге чугаалаан:

— Чонну чыып алгаш, даяңгыыжың туткаш, хаяга баргаш “сугдан бер” деп чугаала. Суг хаядан ага бээр.

А Моисей база Аарон израильчилерге дыка шыжыгып турганнар.

— Чагырга чок чүвелер, дыңнаңар, бисти хаядан суг үндүрүп берзин деп бодаар силер бе? — дээш, Моисей холун көдүргеш, даяңгыыжы-биле хаяны ийи катап хагарга, хаядан шапкын суг агып келген. Чоннуң-даа, мал-маганның-даа суксуну ханган.

Моисей-биле Аарон шын кылганнар бе? Моисей чаңгыс эвес частырыг кылган. Ол хаяны хакпас, а аңаа чүгле чугаалаар ужурлуг турган! Моисей база Аарон хаядан Буурган суг үндүрүп бээринге база чигзингеннер. Ындыг-даа болза Дээрги Бурган Бодунуң чонунга өршээлин хайырлап, сугну берген. А Моисейни база Ааронну ол шииткен:

— Ынчаар кылганыңар дээш, Ханаан черинче кирбес силер.

Оларга ол дыка улуг шииткел болган. Авраамның өргүл бедигээжин кылгаш, Бурганга сөгүрүп чорааны күзенчиг Ханаан черин көөрү Моисейниң улуг күзели турган. А ам ол кылган чүвезиниң ужунда ооң күзели болдунмас болганы ол-дур.

Моисей чер кырында кижилерниң аразындан кончуг чөпшүл кижи.

Израильчилер ону үнелеп көрбейн, буруу чок чергебуруудадып, сөглеп-даа турда, ол каржы харыы оларга кылбаан. Чүгле бо удаада ол бодун туттунуп шыдавайн барганы ол.