Хайгыылчылар

— Ол шынап-ла ёзулуг бай чер-дир — деп, Нуннуң оглу Иисус чугаалаан.Моисей ону арткан он бир салгалдың төлээлери-биле кады даңгыраглаан черниң кандыызын хайгаарап экээри-биле чоруткан чүве-дир.

Олар дөртен хонук дургузунда ол черни өөренип көргеннер. Оон ам ээп чедип келгеш, ол дүжүткүр кара хөрзүннүг, тараалаң делгем ховуларлыг, арга-алаактыг чер дугайын чонга магадап хөөреп турганнар. Олар виноградтың чочак салбаан угбайн, узун ыяшка арта каап алгаш көдүрүп эккелгеш, чаңгыс үн-биле бадыткап турганнар:

— Ханаан — ак сүт база ары чигири агып чыдар чер-дир!

Оон арай ыыды чидип, ыытташпайн баарга, оларның аразындан бирээзи дидимненип чугаалаан:

— Моисей, ол чер чеже-даа бай болза, бис ону эжелеп шыдавас бис. Ооң чурттакчылары аажок бедик, мөге-шыырак улус-тур!

Хайгыыл кылып чораан улустуң артканнары база шупту ында күш-шыырак великаннар бар, хоорайны долгандыр быжыг ханалар-биле камгалалдыг деп чаржалаштыр чугаалап эгелээн.

Чыылган чон оларның аайынга кирип, килеңге алзып, хорадап алгыржы берген. Чонну уштунар арга чок байдалда эккелген деп, Моисейни буруудадыр болган.

Хенертен алгы-кышкыны базып, аразындан бир кижи шиитпирлиг, дыңзыг үн-биле дыңнаткан. Иуданың салгалындан төлээлеп, чаа черни барып көрүп чораан ол кижиниң ады Халев чүве-дир.

— Бис оларны тиилеп шыдаар бис! Меңээ бүзүреңер! Чүүден артык Бурганга бүзүреңер! Ол черни биске бээрин аазаан Бурган биске дузалаар! — деп Халев кыйгырыг салган.

Нуннуң оглу Иисус Халевти деткип чугаалаан:

— Сорук чок, кортук кижилер аайынга кирбеңер! Кортуктуң караа көскү. Чүгле Бурганга удур үймээн кылбаңар!

Нуннуң оглу Иисус-биле Халевтиң чугаазын үзе кирип, а өскелери хорадаан, алгы-кыш кызы аажок. Анчыгзынып, хорадаан улус оларны дыңнаар хөңнү чок. Ол өйде хенертен ыдыктаан майгын кырында булут доктаай бергенин көрүп кааннар. Дээрги Бурган алдары-биле ыдыктаан майгын-­өргээде келгени ол. Ол-ла дораан мөөң улус хыйланырын соксаткан. Израиль ниитилелге Бурганның чүнү чугаалаар дээнин билип аар дээш, Моисей ыдыктаан майгынче далажыпкан.

— Бо чоннуң меңээ бүзүрелиниң кошкаа дээш, оларны язва-биле узуткаар мен! — деп, Бурган шыңгыы шииткел кылган.

Чоннуң бачыдын ам база өршээрин Моисей Бургандан чаннып дилээрге, Бурган аңаа:

— Ындыг-дыр — дээш улаштырган. — Сээң дилеп турарың дээш оларны узуткавас мен. Ындыг-даа болза Египетке оларны дээш Мээң кылган хуулгаазыннарымны көрген-даа болза, кургаг ховуларга боттарының чаңы-биле аажылап чораан өгбелериңер Мээң даңгыраглааным черни көрбестер. Мен оларга даңгыраглыг черже кирер чөпшээрел бербес мен.

Чон кургаг ховуларга чүгле дөртен чыл дургузунда көшкүн чурттаан соонда даңгыраглыг черже кирер. Ол үе дургузунда улуг кижилер шупту өлгүлеп каарга, чүгле Нуннуң оглу Иисус-биле Халев дириг арткаш, бо хүнде назы четпээн уруглар-биле кады Ханаанче кирер аргалыг.