Алдын бугажык

Бурган-биле чугаалажыр дээш Синай даанче чоруткаш, Моисей үр апарган. Ооң чедип кээрин чон четтикпейн манап шаг болган. Чон Моисейни манап четтикпейн, ооң үр саадай бергенинге хөлзеп эгелээннер. Олар өске чоннар ышкаш, аңаа мөгеер дээш, бурган кылып аар деп шиитпирлеп алганнар. Дүрзү бурган дээш Ааронну амыратпайн туруп бээрге, ол чөпшээрежипкен.

— Ындыг-дыр! — деп ол кылыктанып чугаалаан. — Силерге бургандан кылып берейн!

Бурганның айтыышкынын үреп, изрильчилерниң ээрежиринге дүжүп берипкенин Аарон билип турза-даа, оларга удурланып шыдаар хире, дидим эвес болганы ол. Ниитилелдиң эккелген алдынын бөлгеш, эзилдиргеш, оон алдын бугажык дүрзүзү кудуп берген. Кылган дүрзүнү ол чон баарынга тургузуп бээрге, оларның өөрүп турары хөлчок.

— Бистиң бурганывыс бо-дүр!

Моисей Синай даандан бадып кел чыда дыңнаарга чон амырап, хөлчок шимээргеп турар. Ол чаңгыс көргеш-ле чүү болганын билген.

— Хай-халаптыг, бачыттыглар! Бурган чоктар! — деп, Моисей килеңнеп, үнүн дыңзыдыр кончуттунуп, карак чажы дола берген, ыглаар чыгыы. Израиль чону будалып, дириг Бурганны каггаш, кудуп кылган бугажыкка чүдүй берген!

Ол коргунчуг улуг бачытты көргеш, Моисейниң хорадаан кылыындан чүрээниң оду хып, дашта бижээн хоойлуларын өрү бедик көдүргеш, бар күжү-биле хаяга буза шааптарга, ооң бузундулары чаштагылай берген.

Моисей алдын бугажыкты узуткап кааптар айтыышкын бергеш чугаалаан.

— Силер аар, улуг бачыт үүлгеттиңер. Мен база катап Бургандан дилег кылып, дагже үнүп көрейн. Канчап билир, Бурган ам база шыдажып, өршээлин биске хайырлаар чадавас.

Моисей катап база Синай даанче үнүп, чону дээш Бургандан өршээл дилеп, дилег кылган:

— Бир эвес Сен өршээп шыдавас болзуңза, бир эвес Сен оларны узуткаарын шиитпирлезиңзе, мени база катай чок кылып каавыт — деп, чалбарган.

— Бачытты үүлгеткен кижини шиидер мен, Израиль чонун шуптузун эвес. Силер чоруткаш, барып Авраамга, Исаакка база Иаковка даңгыраглаан черимни эжелеп чурттаңар. А Мен Бодум силерниң-биле барбас мен –деп Бурган харыылаан.

— Дээрги Бурган! — деп, Моисей улам ханы чалбарып дилээн. — Сен бистиң-биле барбас болзуңза, мен база олче чонну чедирер хөңнүм чогул, чүге дээрге Сен чогуңда бистиң өлүрүвүс чайлаш чок!

— Ындыг-дыр, Моисей. Мен сеңээ ынак мен — деп Бурган харыылаан, — ынчангаш сээң дилээңни күүседир мен. Чонга өршээлим бергеш, даңгыраглааным черже кады баар мен.

Сөөлзүредир Бурган Моисейге чаа даш плитадан белеткээш, аңаа он чагыг-­хоойлуну катап база бижиирин дааскан.