Синай даа

Израиль ниитилели майгыннарын даг эдээнге тургускулап алган, чүге дээрге булут адагаш ол черге доктаап турупкан. Бурган Моисейге даг кырынче үнүп кээрин дужааган. Ол тускай ажыдыышкын бээр дээни ол. Моисей дагже үнүп кээрге, Бурган аңаа чугаалаан:

— Египет чурттундан үндүрүп тура, Израиль чонунга Мээң кайы хире өршээлдиг болганымны билир сен. А ам олардан барып айтыр; Мээң чагыг-­суртаалым дыңнаарлар бе?

Моисей дагдан бады келгеш, израильчилерден Бурганның чагыг-­сөзүн дыңнаарынга беленин айтырарга чон харыылаан:

— Ийе, Дээрги Бурган чүнү чугаалаарыл, шуптузун күүседир бис.

Моисей дагже катап үнгеш, израильчилерниң харыызын Бурганга чедирген.

— Сээң берген чагыг-­суртаалыңның сөс бүрүзүн Израиль күүседир бис деп харыылады.

Бурган аңаа:

— Оларның-биле сени дамчыштыр чугаалажыр мен. Дагдан дүшкеш, оларга Мээң чүнү чугаалаарымга белен турзуннар деп чугаала.

Моисей дагдан дүжүп келгеш чонга чугаалаан:

— Үш хонук эрттерге Бурганның үнүн дыңнаар база даг бедиинде булут дег Ооң хевирин көөр силер. Аштанып-­арыгланып, Дээргивис баарынга арыг ак хептиг болурунга белеткенип алыңар.

База ол ышкаш, кым-даа чоокшулап, дагга дегбезин дээш, Моисей дагны долгандыр шыйып алыр айтыышкын берген, чүге дизе кым-даа дагга дээп болбас ужурлуг, а дээр болза өлүп болур. Мал-маган база дагга чоокшулавас ужурлуг, чүге дизе ол даг Бурганның алдары-биле долган турар.

Үш хонук эрткенде эртен эрте диңмирээшкинниң чаңгыланган даажын дыңнааш, чон сирилеп турган. Моисей оларга майгыннардан үнүп, көрүжүн Бурганче угландырарын айыткан.

Олар коргунчуг чүве көргеннер. Синай даан долгандыр булут бүргепкен, даг сирилээр, чүге дээрге Дээрги Бурган от хевиринге даг кырында келген. Диңмирээшкин чыжыр кылдыр чаңгыланып, кызаңнаашкын чайыннаар. Даг ышталып, а чон коргуп, сирилээн турган.

Бурган Моисейге чугаалаан:

— Даг кырында Менче үнүп кел.

Моисей чагыртып, чоннуң караанга даг кырынче үне берген. А Бурган аңаачонга чедирер чагыг-­хоойлузун чугаалаан:

— Мен дээрге сени кул болуп чорааның Египеттен үндүрүп келген Дээрги-­Чагырыкчы сээң Бурганың-дыр мен. Сеңээ Менден өске кандыг-даа бурганнар турбазын. Бодуңга дүрзү-­бурган кылба; оларга мөгейбе база бараан болба, Дээрги-­Чаяакчы Бурганыңның адын хей черге адава. Амыр-дыш хүнүн ыдыктап, утпайн чор. Алды хүн дургузунда ажылдап, янзы-бүрү ажыл-херектериң кыл. А чедиги хүн — Дээрги-­Чагырыкчы Бурганыңга бараалгаткан амыр-дыш хүнү-дүр. Ачаң биле аваңны хүндүлеп чор, ынчан Дээрги-­Чаяакчы Бурганыңның сеңээ берип турары чер кырынга амыдыралың узаар. Кижи өлүрбе. Кады чурттаан эжиңге өскерилбе. Оорланма. Өске кижиге удур меге херечилел кылба. Өске кижиде бар чүү-даа чүвени алыксава.

Бурган чугаалаарын доозуптарга, чон амырай берген, чүге дэрге Бурганның ыыткыр үнүн дыңнааш, олар коргар болганнар.

Моисей дагдан дүжүп кээрге израильчилер аңаа чугаалаан:

— Бургандан дилеп көрем, моон соңгаар Бурган бистиң-биле чугаалашпазын, бис кортканывыстан бергедей бээр-дир бис. Ол сеңээ чугаалаарга, сен биске чугаалап тур.

Моисей база катап чаңныктыг булуттарже кире бергеш, Бурганга чоннуң дилээн дамчыткан:

— Олар Сээң үнүң катап база дыңнаарындан коргарлар-дыр.

— Оларның Менден коргуп турары эки-дир. Ынчангаш Мен сээң-биле чугаалажыр мен, а сен Мээң сөстеримни оларга чедирер сен.

Бурган Моисейге дагже үнгеш, чүгле чааскаан Бурган-биле артып каарын айыткан. Моисей дагга дөртен хонгаш чем-даа чивээн, суг-даа ишпээн, Дээрги-­Чагырыкчы ооң амы-тынын арттырып, Моисей-биле булуттан чугаалашкан.

Бурган Израиль чонун Аңаа ыдыктап каан майгын тургузуп бээр айтыышкын берген деп Библия чугаалап турар. Ол майгынны бир черден өске черже көжерде буспас, а көдүрүп аар ужурлуг. Ол майгынны — скиния дээр. Он чагыг-­керээни бижээн ийи даш плиталарны (скрижали) шыгжаар акация ыяжындан хааржак кылгаш, ооң ишти, даштындан алдыннап аар. Ол хааржактың ады — ковчег.

Бурган Моисейге чагыын дооскаш, Бодунуң он чагыг-­хоойлузун бижээни ийи даш плитаны (скрижали) берген.