Манна база хая

Израильчилер ээн куруг хову-биле чораан. Боттары база малы суг ижип алзын дээш, суг үнүп турар черлерге, финиктиг пальма хөлегезинге доктаап, дыштанып чорааннар. Оон улаштыр Синниң ээн ховуларынче углапканнар.

Египеттен үнерде ап алган бичии хлеви төнген. Ам чүнү чиирил? Израильчилер Бургандан чем дилээн болза эки турган. Бурган оларга ынак база оларның аштап өлүрүн болдурбас. А Бурганга бүзүрел-биле ынанып өөренмээн болгаш израильчилер база-ла химиреннип, хыйланып эгелээннер. Олар Моисейге база Ааронга баргаш, мынча дээннер:

— Египетке өлгүлей берген турарывыс кай. Аңаа бистиң аъш-чемивис четчир, эътти, хлебти тоттур чип турган бис. Кургаг ховуларга бисти аштап өлзүн дээш үндүрүп келгениң ол-дур.

Бурганга база Моисейге оларның четтирген сеткили чогун! Ынчалза-даа өршээл, хайыралыг, шыдамык Бурганның Моисейге чугаалааны:

— Бодум чонумнуң сөзүн дыңнадым, оларга чемден бээр мен.

Эртенинде израильчилер майгыннарындан үнүп келгеш көөрге, чер кыры ак-чайт. Моисей оларга:

— Бо Бурганның чоруткан хлеви-дир чыып алгаш майгыннарыңарга өг-бүле улузуңар-биле кады чиңер –дээн.

Израильчилер дээрден дүшкен маннаны (хлеб) чыып эгелээн. Ол шупту кижиге чедишкен. Бурган маннаны дыка эрте чорудар, а израильчилер ону эртен эрте чыыр ужурлуг, чүге дизе манна хүн өрүлеп, изип кээрге эсти бээр болган.

Моисей оларга:

— Маннаны курлавыр кылдыр, артыкка чыгбаңар. Бурган ону биске хүннүң-не чорудуп бээр — деп тайылбырлаан.

Оларның аразындан чамдыктары Моисейниң сөзүн херекке албайн, эртенги хүнге база чыып ап турган. А эртенинде чиир дээш көөрге, оозу курттуп, үрелген, октаар ужурлуг апарган боор.

Ооң соонда каш-ла хонук эрткен… Кургаг ховуларда дамырак-даа, хөл-даа, кудук-даа чок. Чон суксап эгелээн. А Бурган оларны суксап өлүрүн болдурар деп бе? “Чок!” болбайн канчаар. Ындыг турбуже олар Бурганга эвес, а база-ла Моисейге хыйланып келгеннер.

— Египеттен бисти чүге үндүрүп келдиң? Ээн ховуларга бистиң ажы-төлүвүстү база мал-маганывысты кадып-­суксап өлзүн дээш бе?

Олар хорадаанындан Моисейни даш-биле согар чыгыы. А Моисей ол дилег-биле база катап Бурганга келген.

— Бо чон-биле чүнү канчаптайн? — дээн.

Ынчан Бурган чугаалаан:

— Даяңгыыжың тудуп алгаш, кады чоруур кижиден чон аразындан база эдертип ал. Хаялыг тей кырынче үне бергеш, хаяны даяңгыыжың-биле хагарыңга, оон суг ага бээр.

Моисей Бурганның айытканы-биле хаяны хаптарга оон арыг соок суг ага берген. Кагып- суксаан чонга ону ижерге таптыын чүү дээр! Оларның кургап каткылай берген эриннери, дылы, боостаазы ам суксун ханган! Мал-маган база сугну шыдаар шаа-биле ижип болур.

Израиль ниитилели куруг ховуларга чоруп турган үезинде Бурганга бүзүревейн Аңаа хыйланып турган-даа болза, Бурган оларны кагбаан.