Кызыл далай суун өттүр

Израильчилер чүгле чоруптарга, фараон оларга чоруурун чөпшээрепкенинге хомудай берген.

— Бис оларны сүрүп четкеш, дедир эгиткеш, кезедир ужурлуг бис! — деп, ол шериглеринге дужаал берген. Ол дораан чүгүрүк аъттарны ийи дугуйлуг чууза-­тергелерде дерипкеш, аът дыны туткан кижи чанында ча-согун адыгжылары тургулапкан, израильчилерниң соондан сүрүп, халдыпканнар.

Израильдиң үре-салгалы Ханаан черинче чорупкан. Орукту Бурган Боду айтып чораан. Чоннуң мурнунга Бурган Боду хүндүс булут ышкаш адагаш дег, а дүне ол адагаш оттуг ышкаш орук чырыдып бээр. Хүндүс оларны изиг хүнден булут камгалап, а дүне оттуг адагаш орук чырыдып чораан. Булут доктаай бээрге, Моисейниң айтыышкыны-биле чон майгыннарын тип алгаш, дыштанып аар. А булут шимчеп эгелээрге израильчилер база оруун уламчылап чорааннар.

Ынчалдыр олар Кызыл далай эриинге келгеш, доктаап, майгыннарын тиккилеп алган. Олар майгыннарын чүгле тип доозуптарга, хөй аът даванының даажы, алгырышкан улус үнү дыңналган. Египет талазындан олар фараон база ооң чууза-­тергелиг аъттарлыг хөй санныг аг-шерии халдып кел чыдарын көрүп кааннар. Фараон оларны Египетче дедир эгидер дээш, оларның соондан сүрүп кел чыдары ол.

Чоокшулап кел чоруур чууза-­тергелерни олар аңгадай берген көрүп турганнар.

Канчаптарыл? Мурнунда далай, соонда — фараон бодунуң аг-шерии-биле. Кортканындан израильчилер Моисейни чемелей берген:

Кургаг ховуга бисти өлзүн дээш, чүге эккелдиң? Маңаа өлүрүнүң орнунга кулдар болуп чораанывыс дээре турган чүве.

— Кортпаңар! Бурганның дузазын бо хүн көөр силер! Бисти дээш Дээрги Бурган Боду демисежир, а силер оожургал алыр силер!

Ынчан аңаа кажан-даа кижи көрүп көрбээн чүве болган. Хүнзедир оларның мурнунга орук айтып чораан адагаш булут көдүрүлгеш, израильчилер-биле египет аг-шериг аразынче көже берген. Египетчилер хенертен мурнунда булут дег хана көрүп кааннар. Булут оларны аймадып дүвүредиптерге, фараон булут ырай бергиже манаарын дужааган.

Египет дайынчыларының талазындан кайы хире ол булут караңгыладыр болдур, израильчилер талазындан оларның оруун ол хире чырыдып турган. Израильчилерниң коргуушкуну арай оожургаан-даа болза, оларның мурнунда айтырыг: “ам канчаптарыл?” Шуптузунуң карактары Моисейже угланган болгаш, Бурган Моисейге чугаалаан:

— Даяңгыыжың көдүргеш, холуңну далайже сунувут, израильчилер кургаг чер-биле далай өттүр кеже бээрлер.

Моисей далай эриинге туруп алгаш, холунда даянгыыжын суг кырынче көдүрүпкен. Улуг хат хадып, далай суу көвүктели берген. Хат улгатса-­улгатса далайның суун кыдыынче хадыпкан. А суг ортузундан кежир калбак кургаг дилиндек тыптып келген. Суг ол кургаг черниң кыдыгларын дургаар бедик хана ышкаш турупкан, а хат ону тудуп турган Израильчилерниң мурнунда сугну кежер арга бар апарган. Ол Бурганның кылган кайгамчык онза элдептиг ажылы-дыр! Ам-на израильчилер дидимнени бергеннер. Ам-даа арай шык чыткан орук-биле базыпканнар, Моисейниң соондан олар өг-бүле аайы-биле далайны кежипкеннер.

Египетчилерниң мурнунда булут оожум көдүрлү бээрге, олар далажып аъттарын кымчылап эгелээннер. Далай кежир орук көрүп кааш, олче дораан халдыпканнар. Оларның чууза-­тергелериниң дугуйлары өл элезинге тепкиленип эгелээн, ынчалза-даа фараон бар шаа-биле шериин бурунгаар ойладыр болган. Ол үеде израильчилер шупту далайның өске эриинче кеже берген. Моисей далайже ээлгеш, холунда даянгыыжын суг кырындан куду бадырыпкан. Ол дораан хат соксаан, далай суу катап эрги турган аайы-биле ага берген. Израильчилер аңгадай берген көрүп турганнар, а египетчилер көзүлбес… чүгле чууза-­тергелерниң үрелген каш кезектери сугда салдап турар.

Израильчилер өөрүшкүзүн чаңгыс демниг илередип, Моисей-биле кады байырлалдың ырын ырлажып турган:

— Дээрги-­Чаяакчы — мээң күчү-күжүм, мээң алдарым. Ол мээң алдарым болду. Ол мээң Бурганым, ынчангаш Ону мен кезээде алдаржыдар мен!