Иосиф кулданыышкында

Бир катап Иаков Иосифти одарлыг шынааларда хой кадарган акыларынче айбылаан:

— Акыларыңга барып, мал-маганы эки турар-дыр бе, көрүп кел. Меңээ кээп дыңнадыр сен.

Иосиф ачазының айбызын кылырынга ынаа аажок. Элчиген-даа, чалчалар-даа эдертпейн, каас хевин кедипкеш, ачазы-биле байырлажып алгаш, ол-ла дораан чорупкан.

Ол акыларын дилеп шаг болган. Аңаа бир кижи таваржып, акыларының кайда турарын айтып берген. Акылары Иосифтиң кел чоруурун көргеш, аразында сумелешкеннер:

— Дүш көөр киживис кел чор; ону өлүрүп каапкаш, ханы оңгарже октаптаалыңар, а ачавыска Иосифти араатан аң үзе-чаза соп каапты дээр бис. Ооң дүштериниң канчаар бүдерин көөр бис — дээрге, оларның улуг акызы чугаалаан:

— Ону өлүрүп, хан төкпес-тир, бо оңгарже октапкаш, ээн ховуга кааптаалыңар.

Рувим дедир чедип келгеш Иосифти оңгардан ужулгаш, ачазынга чедирип бээр бодаан. Артканнары Иосифти өлүрбес деп чөпшээрешкеннер. Иосиф чоокшулап кээрге дораан, ону туткаш, шокар каас хевин уштуп алганнар. Иосиф акыларының чүнү канчаар деп турарын билип каан. Ол ыглап-­сыктап, ачазынче салып чорударын ээрежип дилеп, шаг болган, а акылары ону тоовааннар, чүге дизе оларның чүректери каржы, бак болган.

Иосифти ханы оңгарже октапканнар. Ол могап-­шылап турупкан, аштаан, суксун хандырыпкы дег чаңгыс дамды суг-даа чок ханы оңгарга чыткан. Ынак ачазынга ээп кээп шыдавас деп чүвени бодап кээрге Иосифке бергезин чүү дээр!

Ооң уё-човуурун, ыы-сыызын херекке албайн, каржыланган акылары чемненип олуруп алганнар. Ол үеде шуушкан кош тевелер эртип бар чыдарын көрүп кааннар. Ол Египетче чаагай чыттыг чук, бальзам, улуг өртектиг бараан-­сараан аппар чыдар садыг-­саарылга кылган улус болган. Алышкыларның бирээзи Иуда сүме каткан:

— Египетче бар чоруур садыгжылар-дыр. Иосифти кулданыышкынче садыптаалыңар! Ынчан ол бистен ырай бээр болгаш, өлүрери албан эвес апаар-дыр.

Тевелиг улус чоокшулап кээрге дораан оларга:

— Силерге кул садып алырын сүмелеп тур бис. Ол он чеди харлыг мөге-шыырак, каң-кадык чаражы база аажок оол-дур. Египетке ону улуг өртекке садыпкаш, олчалыг болур силер.

Акылары Иосифти оңгардан чоон хендир-биле уштуп эккээрге, садыг саарыкчылары ону топтап хынааш чээрби мөңгүн чооска садып алганнар.

Үүлгедиин чажырар дээш акылары анай өлүргеш, ханынга Иосифтиң хевин борап алганнар. Иаков оглунуң хевин танып кааш, чугаалаан:

— Мээң оглум хеви-дир. Иосифти шынап-ла араатан аң үзе-чире соп, чигени ол-дур.

Ол хөй хонуктарда ыы-сыызын төп ыглаан, ону кым-даа качыгдалындан оожуктуруп шыдаваан…