Иосифтиң дүштери

Иаков он ийи оолдарлыг. Оолдары дөгере өскүлеп келген. Чаңгыс хеймер оглу Вениамин ам-даа чаш. Оозун божааш Иаковтуң кадайы Рахиль чок апарган. Рахильдиң база бир оглун Иосиф дээр. Ол Вениаминден улуг. Ол элээди назынныг, ачазынга дыка ынак болгаш дыңнаңгыры база аажок.

Иаковтуң улуг оолдары хөй санныг хой, өшкүзүн кадарар. Олары бо-ла шын эвес чүве кылгылай бээр болгаш, ачазын муңгарадыр турганнар. Иосиф олар-биле кады турганда акыларының чурум чогун көрүп каар, хомудаар болгаш ачазынга чугаалаар турган. Акылары Иосифтиң оозунга ажынып хорадаар болгаш дуңмазын бо-ла чемелээр, хөңнү чоктар. Иаков Иосифке өске оолдарындан артык ынак. Улуг оолдарынга адазының талазындан шын эвес хамаарылгазы оолдарының хөңнү чогун база адааргалын оттуруп турган.

Бир катап Иаков Иосифке онза чараш өңнүг, шокар хеп чагыдып берген. Ооң улуг оолдарының чаңгызында-даа ындыг хеп чок. Ол дээш оолдарының адааргаары улам кедерээн.

Чамдыкта Иосиф бир тускай дүштер дүжээр. Бир катап ол дүжүнде акылары-биле кады тараа шөлүнге сноптар баглап турган. А акыларының баглап алган сноптары ооң баглаан сноптарынга мөгейип турар. Иосиф аайын тыппайн элдепсингеш, дүжүн акыларынга чугаалаан.

Акылары аажок хорадааннар:

— Сен бисти сеңээ чагыртсын деп бодап турарың ол бе?

Үр болбаанда Иосиф база бир дүш дүжээн. Ол дүштү улам элдепсингеш, ачазынга база акыларынга чугаалаарга, ачазы аңаа хөректенип кончуттунар болган.

— Чүү ындыг дүш дүжеп турар кижи сен? Мени — хүн, аваңны — ай, а акыларыңны ол он бир сылдыстар деп бодап, сеңээ черге чедир мөгейзин деп турарың ол бе?

Ынчалза-даа ол дүш Иосифтиң сагыжынга арткан. Акыларының хорадаары, адааргаары улам кедерээн.

— Иосифтиң адыыргаа кедереп, чүнү-даа бодаар апарды. Ынчап-ла турзунам харын, аңаа көргүзүптер бис.