Иаков өске чуртта

Иаков төрелдериниң чурттап турган черинге чедип келген. Кудукта мал суггарган кадарчылардан Лаванны таныыр силер бе деп айтырарга, олар:

— Ийе, билир бис. Бээр хөй хой сүрүп кел чоруур уругну көрүп тур сен бе? Ол Лаванның бичии уруу Рахиль-дир — дээннер.

Чедер черинде чедип келгенин билгеш, Иаков Бурганга четтиргенин оожум илереткеш, Рахильге дузалажып, хойун кудуктан суггаржып дузалажы берген. Рахильдиң чаражын Иаков дораан эскерип көрген, а бодунуң дугайында чүнү-даа чугаалаваан.

Рахиль Иаковтан айтырган:

— Меңээ чүге дузалажып турарың ол?

— Шагда бо черден сээң төрелиң Ревекка Ханаан черинде ашакка барган чүве — деп ол чугаалаарга, Рахиль тургаш:

— Билир мен. Ол дугайын меңээ ачам чугаалаан чүве. А сен кым сен?

— Мен Ревекканың оглу Иаков-тыр мен.

— Ынчаарга сен мээң төрелим-дир сен. Бажыңывысче чалап тур мен! — деп Рахиль өөрүп чугаалаан.

Лаван Иаковтуң дугайында дыңнап кааш, аңаа уткуштур өөрүшкү-биле маңнап келгеш:

— Бажыңымче кирип, аалчым бол! — деп, Иаковту чалаан.

Лаванның өг-бүлезинде шупту улус өөрүп, столга амданныг чем делгеп салганнар. Шайлаан соонда Иаков орайга чедир оларның айтырыгларынга харыылап кежээлээн: ачазы Исаактың кырып, көөрү база баксыраанын, а Ревекка ам-даа каң-кадык, а ол боду ийистерниң бичииизи-даа болза, адазының салгакчызы болур йөрээлин алганындан бээр чүве арттырбайн хөөреп берген. Лаван оон:

— Чугаалап көрем, сеңээ чер чоруурун ачаң чөпшээреди бе?

— Ол боду мени чорудупту. Мен моон кады чурттаар кадай тып алыр ужурлуг мен.

А Иаков Рахильге ынакшый берген, ол база ооң кадайы болурун күзээр апарган. Ол Лаванның ажылын кылчып, ооң аалынга ай чурттаан. Бир катап Лаван ажылының төлевиринге чүнү алыксап турарын Иаковтан айтырган. А Иаков ол дугайын бодап турган чүве-дир.

— Уругну кижиге бээрде, ооң адазынга төлээрин билир сен, Лаван. Мен Рахильди кадайланып алыксап тур мен. Рахиль дээш төлээр акша орнунга сеңээ чеди чыл иштинде ажылдаарын чөшпээрээр сен бе?

Лаван хүлүмзүрүп бажын согаш кылган.

— Ынчанмайн канчаар, уруумну өске кижиге бээриниң орнунга, сеңээ бээр мен.

Ынчангаш Иаков Лаванга чеди чыл ажылдаан. Хуусаа чедип, үр чыл манап чорааны хүн дүшкен. Чүгле эртенинде Иаков кадайының арнын көрүп каан. Кудада келин кыстың арнын фата-биле дугланып алган, ужуру ындыг. Арын шывыын уштупканда таныжының арнын көрүп кааш, Иаков корга берген: кадайланып алган кижизи Рахиль эвес, а ооң угбазы Лия!

Ол дораан Лаванга маңнап чеде берген:

— Чүге ынчалдың?! Мен чеди чыл иштинде Лия дээш эвес, а Рахиль дээш ажылдаан мен! Чүге мегеледиң?!

— Билип ал, бистиң чонувустуң ёзузу-биле улуг уруу өгленмээнде бичии уруун өглевес ужурлуг.

Иаков турган черинге олура дүшкеш, ыглапкан. Мегеледип деп чүвениң бергезин ол ам-на билген. Ооң соонда Лаван Иаковка ам база чеди чыл ажылдааш, Рахильди база кадай кылдыр ап болурун чугаалаан.

Ол шагда эр улус каш-даа кадай ап болур турган, ынчангаш Иаков ол саналга чөпшээрешкен. Неделя эрткенде база бир куда дүжүргеннер. Бо удаада меге чок, шыны-биле. Иаков ынак Рахилинге кадайланып алган.

Рахиль дээш Иаков база чеди чыл катының ажылын кылып келген, а кажан ол хуусаа төнерге Иаков ол черге ам-даа ажылдап артып калган. Ам ол келин дээш эвес, а бодунга ажылдап, хөй инек малы, өшкү-хою көвүдээш Лаваныындан-даа ашкан. Оон аңгыда ол он ийи ажы-төлдүг: он бир оол, бир кыстыг. Ооң сеткили ханып, оожургаан: Дээрги Бурган ооң-биле кады болгаш, алгап-­йөрээген. Ынчалза-даа үр үе эртпээнде Иаковтуң байынга Лаванның база ооң оолдарының адааргап турар апарганын ол эскерип каан.

Ол үеде Бурган Иаковка ада-өгбезиниң чурттунче өг-бүле улузун ап алгаш, ээп чоруптар айтыышкын берген.