ПА̄ ВЛУСАТ СИЛО

Шоул пиройаϑ масеийен қати бад вудат пех̇и wев тӣжд, ат шичи йу Хабари Хуш па̄нчӣд ҷа̄т фана̄ ме̂нат чӯд. Ик дев дигаргӯнийен ҷа̄тен ба̄д, дига ба ҷойи Шоул Па̄влусен wи лу̊д. Йуйи йи wахт йичанд иму̊ндорен қати тар Европа мис сафар чӯд. Па̄влус тар ар ҷо ца сут йуйи сар пиро ик тар wев иму̊ндорен хез сут иде̂, wеванд ибодатху̊на̄ навудат, wа̄δен ар шанби меϑ йиҷо ваҷанд ҷа̄м сат. Йи рӯзен wа̄δ ху нақл тайор чӯдат, йи бой ɣиник тар wи хез йат. Wам ну̊м Лӣдийа вад. Йа̄йи хойих̇ чӯд дар борайи Исо wамард лапди нақл кинен.

Ба̄ден Па̄влусат wи амрогу̊н дар борайи Масе дароз нақл чӯд. Охиру̊ни Лӣдийа лу̊д: «Му қати дуо кинет, ла̄к Худоwанд Ху зирйот ҷиноw му қабӯл ких̇т. Ба̄д аз ди wуз хойих̇ум та̄мӣд зе̂м.

Лӣдийайен та̄мӣд δодху, йа̄йи Па̄влусат wи ох̇ногу̊н тар ху чӣд мара̄т чӯдху, лу̊ди йила̄в wахт тар му ҷой ниϑет. Амо Па̄влусат wи ох̇но Силойен тар wам чӣд дароз наред. Х̇ар қозийи ба̄д аз йичанд рӯз ар зинду̊н wев пите̂wд. Йу йила̄в мардум норозӣ вуд иде̂, йаӯдийенен йаϑч таредху, рӯмийенат йӯну̊нийенард wа̄з х̇ойен. Па̄влусат Силойанден wев δустенат поδен ɣинʒел қати вӣстху, ар зима̄δен wи хах̇ чӯд. Wевен ик дисга хах̇ вӣст иде̂, wа̄δен на wуцтоw ва̄рδодат на андӣдоw.

Амо wа̄δен варϑ фа̄мт иде̂, Хуδой ар wам зинду̊н мис wев қати. Йуйи wевард қуwатат тоқат да̄кчӯд.

Па̄влусат Силойен соз лу̊дат хушийен чӯд. Wа̄δен ху созенанд холи Хуδой ситоwах̇ чӯд. Аwален оста-оста̄ сар чӯдху, ба̄ден ду̊ндард хах̇ дараw лу̊вд сат иде̂, wам зинду̊нарден фукаϑ wев садо х̇уд. Wа̄ϑ дига бандийенен айру̊наϑ ред иде̂, цара̄нг да̄δ δу нафар ар зинду̊н мис хуши киненат соз лу̊вен.

Йакбораϑ тар wев аwоз арчӣзцага садо мис алалаш сут. Йу садо сар пиро оста̄ вудху, йакбораϑ хах̇ сутху, йу зима̄δ дараw лаɣʒа̄ сут. Йид замӣнҷумби вуд. Йа̄ зинду̊н ҷумбенчак сат, амо нанихах̇т.

Па̄влусат Силойен чӯх̇т иде̂, йу зима̄δ дӯсик йет суδҷху, wа̄δен ва̄рδод wи ɣинʒел азаманд питинен. Ба ғайри ди, зинду̊н дивийен мис фукаϑ йет сат.

Ди замӣнҷумбийанд зинду̊н пайра̄ мис ага̄ сут. Йу аз ху ҷойти андӯйдху чӯх̇ти иде̂, зинду̊н дивийенен фукаϑ йет.

Йуйи фикр чӯд: «Wа̄δ бандийенен х̇о фукаϑ рицост. Ди ҷа̄тта хах̇ ҷазо му δен, ат бӣди су̊д wуз хубаϑ ху ца зӣнум!»

Па̄влуси ба̄д чӯх̇т иде̂, йу пайра̄йи шамшер зиwостху чи зӣд хи сут. Йуйи ба̄д хах̇аϑ қӣwд: «Ма̄зӣн ху! Ма̄ша̄м фукаϑ тару̊д!»

Йу пайра̄йи чӯх̇т йича̄йаϑ нарицӯсч, ба̄ди Па̄влусат Сило кинор анҷӯвд. Йуйи ба̄д фикр чӯд: «Меванд мев Хуδой мев халосчӣд ҷа̄т замӣнҷумби ца ких̇т, Йу пас ақу̊ни Хуδой вуδҷ».

Ба̄ди пех̇цт wев: «Е бузурген, wуз бойад чӣрумху ла̄к наҷот вирӣм?» Па̄влуси wирд ҷаwоб δод: «Худоwанд Исои Масейард иму̊н ваху, ба̄дта наҷот вирийи!»

Ба̄ди ди wоқийа̄йи йу зинду̊н пайра̄ Па̄влусат Сило тар ху чӣд қӣwд.

Wа̄δен розӣ сатху, пу̊ндвайен дар борайи Исо нақл чӯдат, тойден. Ба̄ден тар wи чӣд фирӣптху, ху нақлийен даwу̊м δод. Лу̊ден иде̂, Исойи мардумард фук wахт неки чӯд, ат мардуми мис аз Wи га̄пδе̂дат аз Wи зиндагинди фа̄мт иде̂, Йу ақу̊нийаϑ Хуδой Пуц.

Wа̄δен wирд нақл чӯд иде̂, цара̄нген рӯми аскарен салӣбти Исо чорме̂х δод, амо Wинд йичӣзаϑ айб навуд. Wа̄δен ба̄д wирд фа̄му̊нт иде̂, чӣзард шич wев мис пех̇ та̄женат, ҷазо δенат, wев қати мис wев Худоwанд ҷиноw муносибат кинен. Wа̄δен wи пайра̄ ху̊наwода̄йард нақл чӯд иде̂, Исойи фукаϑ мардум гунойен ҷа̄т ху ҷу̊н сипорт, аз у̊н ҷумла̄ арйаки wев ҷа̄т. Йуйи ик wам салӣбти фукаϑ гунойен бар Ху зох̇т, ла̄к одамат Хуδой байнард во баша̄нд муносибат суд. Па̄влусат Силойен дар борайи Масе зиндасидат, Рӯи Пок мис нақл чӯд. Wа̄δен лу̊д иде̂, арча̄йта Исойард боwар ца ких̇т, Йу фук wахт Рӯи Пок қати wи хезанд.

Йу пайра̄йи ба̄д лу̊д: «Wуз мис хойих̇ум Исо банда̄ вӣм. Wуз хойих̇ум ла̄к Исо Ху зиройот ҷиноw му қабӯл ких̇т». Йеданди ба̄д wи ɣин мис лу̊д: «Ага Хуδой ɣиникен мис қабӯл ца ких̇т, wуз мис хойих̇ум Wирд хизмат кинум».

Па̄влуси wамард лу̊д: «Хабари Хуш а̄м тар ɣиникенат, а̄м тар кӯдакен мис дахл! Ик ми тама х̇а̄ранд йи ɣиники пигоϑ Масе қабӯл чӯд».

Wа̄δ сойибху̊найенен ба̄ди ди нақл та̄мӣд қабӯл чӯдху, Па̄влусат Силойарден аwқот вӯд. Ба̄д наw хӣр пал чӯдат wа̄δен wитийаϑ тар Лӣдийа чӣд сат, ду̊н ҷа̄т йа̄йи wев ҷа̄т лап зақт. Па̄влусат Силойен ба̄д wамард нақл чӯд иде̂, цара̄нги Хуδой аз зинду̊нанд wев халос чӯд. Ба ғайри дийен дар борайи wи пайра̄йат wи ху̊наwода̄ нақл чӯд иде, wам пиро х̇а̄бен Худоwанд қабӯл ца чӯд!