ПЕТРУС АР ЗИНДУ̊Н

Рӯм импира̄тури Иродуси Бузург нибос Иродуси Ағрипос Ерусалӣмат бех̇ди Фалистӣн х̇аренанд подх̇о не̂δд .

Wи подх̇ойи даwра̄йанд масеийенти лап зулм вуд.

Иродуси фа̄мт иде̂, йаӯди хӯҷайӣнененат wев тарафдоренен Исо х̇огирденат Wи пайраwен қати бад вад. Йуйи ба̄д римод йӣw аз wев х̇огирден, Йуано вирод Йа̄қӯб зинен. Йу гуйо ик дити wев йаӯди хӯҷайӣненат, wев тарафдорен хезанд шӣрӣн ху чичӣд вуд. Йаӯдийенен Иродус фарму̊н қати розӣ вад, йуйи ба̄д римод Петрус мис анҷенху банд wи кинен.

Wийен ар зинду̊н пите̂wдху, Иродуси римод иде, ла̄к шу̊нзда̄ аскар х̇а̄бат меϑ wити пайра̄ вийен.

Иродуси wи зӣдоw рӯз мис муа̄йан чӯд, амо Калисойи мис wи ҷа̄т х̇а̄бат меϑ Хуδойард дуо чӯд. Дига х̇огирденен ик ди wахтанд тар Ерусалӣм навад. Wа̄δен аз х̇оҷи Иродус аз х̇а̄ранд тойд.

Амо ба ғайри wев Ерусалӣманд ғал Масе пайраwенен фана̄ вад. Wа̄δен фукаϑ Йуано на̄н, Марйам чӣданд ҷа̄м сатху Петрус ҷа̄тен йакҷойаϑ дуо чӯд.

Ат Петрус ик ди wахтанд ар зинду̊н қарораϑ х̇овҷин вуд. Δу аскарен фук wахт wити пайра̄ вад. Ба ғайри wевен, а̄м дарӯнат а̄м ваҷ дивийен хезандат, ам дарвоза̄ хезанд мис пайрайен нӣсцин вад. Петруси рицӣстоw ва̄рδоδҷато? Най. Йу чи рицӣст мис навуд.

Амо йеданд аҷойиб кор сут. Банока̄фанд Фарих̇тайи Худоwанд Петрусард зойир сут. Петрус ди wахтанд х̇овҷин вуд. Йу фарих̇та̄йи ба̄д ҷумбент wиху, лу̊ди: «Тезди андиʒ!»

Наwи фарих̇та̄ ик ди га̄п лу̊дат, аз Петрус δусти йу ɣинʒел йет сут. Ба̄ди фарих̇та̄ римод wи ху бӯтенат ху луқен пинӣздат, ху мийендга вӣст. Wа̄δ аскаренен ди wахтанд х̇е̂вʒин вад.

Ба̄ди фарих̇та̄ wирд лу̊д: «Му да̄мти йа!»

Петруси чӯхт wа̄δ дивийенен йет вад, ба̄д фарих̇та̄ да̄мти тӯйд. Wа̄δен wев х̇е̂вʒин аскарен па̄лива наɣҷӣдху пи wи сипинин дарвоза̄ хезен фирӣпт. Йу дарвоза̄ хубаϑ wевард йет сут. Wа̄δен йакҷойаϑ тар х̇а̄р нах̇тойдху, йила̄вгайен тойдат, йу фарих̇та̄ йакбораϑ ғайб сут.

Петрус ба худ йатху, лу̊ди: «Шичардум фа̄мт иде̂, Худоwанди Ху Фарих̇та̄ бохт, ла̄к йу аз Иродусат йаӯдийен ча̄қанд му халос ких̇т, ат wа̄δен чизӣд му вад».

Ба̄д йу ик тар wи чӣд хез сут иде̂, тарамен иму̊ндорен ҷа̄м сатху, wи ҷа̄тен дуо ца чӯд. Петруси дивити туқ-туқ δодху йи ɣиник тар диви хез сат. Йа̄йи Петрус садо фа̄мтху, аз хуши ба ҷойи диви йетчӣд йа̄ во wижӣвдху, wеварди лу̊д иде̂, Петрус диви хезанд wирӯвҷ. Х̇огирденен wам га̄п боwар начӯдху, лу̊ден иде̂, диви хезандх̇о ику фарих̇та̄ wирӯвҷ иде̂, Худоwанди Петрус муофизатчӣд wи ца бох̇т Ат Петруси во йичанд пӣδга мис туқ-туқ δод. Wа̄δен диви йет чӯдху, Петрусен wӣнтху, айру̊наϑен ред. Фукаϑен хушизор сат! Петруси ху δуст тар wев wеδдху, хойих̇и чӯд wа̄δ хах̇ га̄п ма̄δен, ла̄к дух̇манен хабар ма̄сен. Wа̄δен ба̄д ору̊м сатху, Петруси wевард нақл чӯд иде̂, цара̄нги Худоwанд Ху мӯҷиза̄ қати аз зинду̊нанд wи озод чӯд.

Ба̄д аз ди Петрус аз Ерусалӣманд тӯйд, ла̄к Иродус wи ма̄виред.